काठमाडौँ । जाजरकोट र रुकुम पश्चिमका भूकम्प पीडितहरुमा दूषित खानेपानी र खानपानले स्वास्थ्यमा समस्या देखिन थालेको छ । उनीहरुमा झाडापखाला र श्वासप्रश्वासको समस्या बढी मात्रामा देखिएको स्वास्थ्य उपचारका लागि त्यहाँ पुगेका स्वास्थ्यकर्मीहरु बताउँछन् ।

भुकम्प प्रभावितहरुको स्वास्थ्य उपचार गर्न जाजरकोट पुगेको कर्णाली स्वास्थ्य विज्ञान प्रतिष्ठानको टोलीले गर्भवती, सुत्केरी र पालमा बसेकाहरुको स्वास्थ्य अवस्था नाजुक बनिरहेको जनाएको छ ।

अहिले प्रतिष्ठानको टोलीले भुकम्प पीडितलाई औषधि उपचार गर्ने काम गरिरहेको छ । टोली प्रमुख डा. मनिराज क्षेत्रीले नलगाड क्षेत्रको प्रभावितहरुमा चिसो बढिरहेको र पालमा बसिरहेकाले स्वास्थ्य अवस्था बिग्रँदै जान थालेको जानकारी दिए ।

भुकम्प पीडितहरुलाई चिकित्सकहरुका फरक फरक टोलीले गाउॅ गाउँमा पुगेर उपचार गरिरहेका छन् । टोलीले बिग्रँदो स्वास्थ्य अवस्था सुधार्न आग्रह गरिरहेका छन् ।

अमेरिकन नेपाल मेडिकल फाउण्डेशनले प्रतिष्ठानको टोलीमार्फत सरसफाइ सामग्री उपलब्ध गराइरहेको छ । राहत, औषधि उपचार पुग्न नसकेको क्षेत्रमा प्रतिष्ठानको टोली पुगिरहेकोले भूकम्पले थलिएका बिरामीहरु र पीडितहरुको मनमा मलम लगाउन सकिएको टोलीका सदस्यहरु बताउँछन् ।

गर्भवतीहरु, सुत्केरी महिलाहरु र पालमा बसेका पीडितहरुमा मानसिक तनाव र झाडापखालाको समस्या रहेको टोलीका सदस्यहरु बताउँछन् ।

टोलीले प्रभावित गाउॅबस्तीमा पुगेर स्वास्थ्य जाँच, मनोसामाजिक परामर्श, स्वास्थ्य सामग्री वितरण लगायतको कार्य गरिरहेको प्राध्यापक डाक्टर क्षेत्रीले बताए । प्रतिष्ठानको जनस्वास्थ्यको टिमले जाजरकोटको नलगाड नगरपालिकाको वडा नम्बर १, २, ३ मा भूकम्पपछिको जनस्वास्थ्यको अवस्था अवलोकन गरेको जनाएको छ ।

कर्णाली प्रतिष्ठानका मनोसामाजिक परामर्शदाता नन्दराज आचार्यले भूकम्पले उत्पन्न विपदका कारण पीडितहरुमा स्वाभाविकरुपमा मनोबल घट्ने भएकोले यस्तो बेला उचित मनोपरामर्श आवश्यक रहेको बताए । उनले प्रभावित क्षेत्रमा पीडितको मनोभावनामा परेको प्रभावअनुसार आवश्यकताका आधारमा प्राथमिक मनोवैज्ञानिक परामर्श, सामूहिक परामर्श र व्यक्तिगत परामर्श गर्न थालिएको जानकारी दिए ।

कर्णाली स्वास्थ्य विज्ञान प्रतिष्ठान र अमेरिकन नेपाल मेडिकल फाउण्डेशनको सहयोगमा टोलीले सेवा दिइरहेको छ । साथै टोलीले पीडितलाई घरमै पुगेर आधारभूत स्वास्थ्य सामग्रीः हाईजिन किट (साबुन, ब्रस, तुथपेस्ट, सेनिटरी प्याड, पानीमा हाल्ने प्यूस) समेत प्रभावितलाई वितरण गर्दै आएको छ ।

भूकम्पले प्रभावित जाजरकोट–रुकुम पश्चिमका पीडितलाई उद्धार तथा उपचार सेवा दिन यसअघि पनि कर्णाली स्वास्थ्य विज्ञान प्रतिष्ठान शिक्षण अस्पातलको टिम प्रभावित क्षेत्रमा काम गरेर फर्किएको थियो ।