काठमाडौं । हङकङमा आज (बुधबार) देखि सुरुहुने चार देश सम्मिलित महिला टी-२० आई सिरिजको उद्घाटन खेलमा नेपाल र तान्जानिया भिड्दैछन्।

वाङ नाइमा हुने खेल बिहान सवा ७ बजेदेखि सुरु हुनेछ।

नेपाल आजको खेलमा इन्दु बर्माको कप्तानीमा मैदान उत्रदैछ। लामो समयपछि नेपालले आजको खेलबाट महिला टोलीको कप्तानी परिवर्तन गर्दैछ।

नेपाली टोलीमा तीव्र गतिका बलर सोनी पाख्रिन र सोमु विष्टले स्थान बनाएका छन्। यी मध्ये १ खेलाडीले आजको खेलमा डेब्यु गर्ने सम्भावना छ।

नेपाल र तान्जानिया पहिलो पटक आमनेसामने हुन लागेका हुन्। टी-२० आई वरियतामा नेपाल २१ र तान्जानिया १९ औं स्थानमा छन्।

हङकङमा सुरु हुने सिरिजमा घरेलु टोलीसँगै नेपाल, जापान र तान्जानिया छन्।

नेपालले आफ्नो दोस्रो खेलमा बिहिबार घरेलु टोलीसँग खेल्नेछ। शनिबार जापानसँग खेल्ने तालिका छ।

समूहका शीर्ष २ टोली उपाधिका लागि आइतबार आमनेसामने हुनेछन्। सोही दिन पुछारका दुई टोली तेस्रो स्थानका लागि खेल्नेछन्।