काठमाडौं । सत्तासाझेदार दल नेपाली कांग्रेसको केन्द्रीय कार्यसम्पादन समितिको बैठक आज बस्दै छ ।

बैठक दिउँसो १२ः१५ बजे कांग्रेस केन्द्रीय कार्यालय सानेपामा बस्ने कांग्रेसका मुख्यसचिव कृष्णप्रसाद पौडेलले बताएका छन् ।

बैठकमा कांग्रेसको महासमिति बैठकका बारेमा विशेषगरी छलफल हुनेछ । कांग्रेसको महासमिति बैठक आगामी पुस १६ देखि १९ गतेसम्म गर्ने गरी मिति तोकिएपनि कांग्रेस सभापति शेरवहादुर देउवा देखि अन्य शीर्ष नेताहरु बैठक सार्ने तयारीमा रहेका छन् ।

तर इतर पक्षका नेताहरु निर्धारित समयमै महासमिति बैठक गर्नुपर्ने पक्षमा छन् । कांग्रेसको कार्यसम्पादन समितिको आजको बैठकले कांग्रेसको उक्त महासमितिको बैठक निर्धारित समयमै गर्ने या सार्ने भन्ने बारेमा आज निर्णय लिने कांग्रेसका नेताहरु बताउँछन् ।

यसका अतिरिक्त आजको बैठकमा राष्ट्रिय सभा चुनावमा सत्ता गठबन्धन दलका बीचका भागवन्डा, पार्टीका उम्मेदवारहरुका मापदण्डका बारेमा पनि समान्य छलफल हुनसक्ने नेताहरुको भनाई छ । जाजरकोट भूकम्प र समसामयिक राजनीतिक विषयमा पनि बैठकमा छलफल हुनेछ ।