काठमाडौं । प्रतिनिधि सभाका सभामुख देवराज घिमिरेले विदेशी सहयोगहरूको सही सदुपयोग नभएको भन्दै असन्तुष्टि जनाएका छन् ।

शुक्रबार काठमाडौंमा आयोजित एक कार्यक्रममा बोल्दै सभामुख घिमिरेले विदेशी संघसंस्थाहरुले आफ्नो उद्देश्य पूरा गर्नका लागि सहयोगका कार्यक्रमहरू ल्याइरहने क्रम बढेको भन्दै विदेशी लगानी सही ठाउँमा सदुपयोग गर्नुपर्ने बताएका हुन् ।

अहिले विदेशी सहयोगका लगानीहरु आफ्ना उदेश्य उन्मुखमात्र हुने भएकाले यसको गम्भिर निगरानी गर्नुपर्ने उनको भनाइ छ ।

वैदेशिक सहयोगहरूको सदुपयोग ठिक ढङ्गबाट गर्नका लागि आम जनताको पहुँचमा सहायता बारेको जानकारी पुग्नुपर्ने उनले बताए । देशको विकास गर्न विभिन्न वैदेशिक सङ्घ संस्था, राष्ट्र र कार्यक्रमहरूमार्फत आइरहेका सहयोगहरूलाई सरकारमार्फत संसद्मा पेस गर्ने र सांसदले त्यसको प्रयोग कहाँ, कुन क्षेत्रमा र कसरी गर्नुपर्छ भन्नेबारेमा बजेट वा नीतिअन्तर्गत कार्यान्वयनमा नआएकाले कार्यन्वयनमा लैजान जोड दिनुपर्ने उनले बताए ।

वैदेशिक सहयोगको कार्यान्वयन भइरहेका ठाउँको निरीक्षणमा सांसदले प्रभावकारी निगरानी नपुगको उनले बताए ।