काठमाडौं । बागमती प्रदेशले प्रधानमन्त्री कप एकदिवसीय राष्ट्रिय प्रतियोगितामा गण्डकी प्रदेशलाई १९९ रनको लक्ष्य दिएको छ ।

त्रिवि क्रिकेट मैदानमा टस जितेर पहिला ब्याटिङ रोजेको बागमती ४९.१ ओभरमा १९८ रनमा अल आउट भएको हो ।

बागमतीका लागि ओपनर आशुतोष घिरैयाले ६९ बलमा ५ चौकासहित सर्वाधिक ४४ रन बनाए । ईशान पाण्डेले ६२ बलमा २ चौका र २ छक्कासहित ४३ रन बनाए । अन्य ब्याटरले भने राम्रो प्रदर्शन गर्न सकेनन् ।

बागमतीलाई अल आउट गर्न गण्डकीका कमल परियार एक्लैले ४ विकेट लिए । यस्तै विपिन खत्री र अमृत गुरुङले समान २ २ विकेट लिए । सन्दीप पराजुलीले १ विकेट लिए ।

गण्डकी ४ खेलमा १ मा जित र ३ मा हारसहित २ अंकका साथ आठौं स्थानमा छ भने बागमती ६ खेलमा ४ मा जित र २ मा हारसहित ८ अंकका साथ दोस्रो स्थानमा रहेको छ ।