बागमती। बागमती प्रदेश सभाको शुक्रबारको बैठक पनि सूचना टाँस गरेर स्थगित गरिएको छ। निर्धारित समयभन्दा दुई घण्टा ढिलासम्म पनि बैठक सुरु हुन नसकेपछि बैठक सूचना टाँस गरेर स्थगित गरिएको हो।

बिहीबारको बैठकमा प्रतिपक्षी दलहरूले अवरोध गरेपछि आज शुक्रबार बिहान ११ बजेका लागि बैठक बोलाइएको थियो। तर, दलहरूबीच बजेटको विषयलाई लिएर सहमति हुन नसकेपछि आजको बैठक पनि स्थगित गरिएको हो।

बजेट असन्तुलित र त्रुटिपूर्ण रहेको भन्दै प्रतिपक्षी दलहरू कांग्रेस र राप्रपाले प्रदेश सभा बैठकमा विरोध जनाएपछि बैठक प्रभावित हुँदै आएको छ। बजेटमाथि छलफलका लागि आह्वान गरिएको बिहीबारको बैठकमा प्रतिपक्षी दलहरूले नाराबाजी गरेका थिए।

उनीहरूले बजेट पुनः लेखन गर्न माग गर्दै आएका छन्। बजेट पुनः लेखन नभएसम्म बैठक चल्न नसक्ने प्रतिपक्ष दलहरूको चेतावनी छ।

बजेटमाथिको विवाद समाधान गर्न बिहीबार बिहान बोलाइएको सर्वदलीय बैठकसमेत बस्न सकेको छैन। सत्तापक्ष दलहरूबीच सहमति जुट्न नसक्दा सर्वदलीय बैठक र प्रदेश सभा बैठकसमेत प्रभावित भएको हो।