मुम्बईको ग्रान्ड रोड क्षेत्रमा रूबिना मन्जिल नामक भवनको कौसीको केही भाग भत्किँदा एक महिलाको मृत्यु हुनुको साथै अन्य १३ जना घाइते भएको बृहान् मुम्बई नगरपालिका (बीएमसी) ले जनाएको छ ।

उक्त घटना शनिबार बिहान ११ बजे ‘ग्रान्ट रोड रेलवे स्टेशन’ नजिक भएको हो ।

“दोस्रो र तेस्रो तल्लाको केही भाग र माथिल्लो चार तले संरचना आंशिक रूपमा भत्किएको र केही भागहरू भत्किन लागेको छ,” बीएमसीले एक विज्ञप्त जारी गरी जानकारी गराएको छ ।

यस घटनामा कम्तिमा सात वा आठ जना बासिन्दाहरू चार–तले भवनको माथिल्लो तलामा फसेका र उनीहरूको मुम्बई फायर ब्रिगेड, प्रहरी, एम्बुलेन्स र कर्मचारी र नागरिकको सहयोगमा उद्धार कार्य सुरु गरिएको छ ।

“कौसीको केही भाग भत्किँदा एक जनाको मृत्यु भएको र १३ जना घाइते भएका छन् । उनीहरूलाई स्थानीय अस्पतालमा लगिएको छ । यहाँ एक महिलालाई मृत घोषित गरिएको र अन्यको उपचार भइरहेको छ,” मुम्बई प्रशासनले जनाएको छ ।

महाराष्ट्रमा लगातारको वर्षाले मुम्बईलाई ठप्प बनाएको छ । बर्षा र डुवानलेसार्वजनिक यातायात सेवाहरू अवरुद्ध भएको र असङ्ख्य यात्रुहरूलाई असुविधा भएको जनाइएको छ ।