काठमाडौं । प्रधानसेनापति अशोकराज सिग्देलले उपरथी दर्जामा पदोन्नति भएका सहायक रथी हरेन्द्र पाठकलाई दर्ज्यानी चिह्न प्रदान गरेका छन् ।

सैनिक मुख्यालय जंगी अड्डामा सोमबार आयोजित एक समारोहमा प्रधानसेनापतिले उनलाई दर्ज्यानी चिह्न प्रदान गरेका हुन् ।

यही असोज १८ गते पाठक उपरथी दर्जामा पदोन्नति भएका थिए । पदोन्नतिसँगै उपरथी पाठकलाई नेपाली सैनिक वार कलेजको शिक्षाधिकृतमा नियुक्त गरिएको छ ।

प्रधानसेनापतिले सोही अवसरमा सहायक रथी दर्जामा पदोन्नति भएका महासेनानीद्वय मनिकुमार श्रेष्ठ र विष्णुबहादुर कार्कीलाई सहायक रथी दर्जाको दर्ज्यानी चिह्न प्रदान गरेका थिए ।

महासेनानी दर्जामा पदोन्नति भएका प्राविधिक प्रमुख सेनानी डा.निरव कायस्थ, प्रमुख सेनानी प्रशान्त बज्राचार्य, प्रमुख सेनानी रित बहादुर रानाभाट, प्रमुख सेनानी सरोज राना र प्रमुख सेनानी सुशिल महतलाई महासेनानी दर्जाको दर्ज्यानी चिह्न प्रदान गरेका थिए ।

दर्ज्यानी चिह्न प्रदान गर्न आयोजित कार्यक्रममा रथी तथा अधिकृतहरूका साथै पदोन्नति भएका रथी एवं अधिकृतका परिवारजनको उपस्थिति थियो ।