शनिबार, मंसिर १३, २०८२

एसोसिएट स्टार मुस्तफा सुदूरपश्चिम रोयल्समा अनुबन्धित

मेरोन्यूज २०८१ कार्तिक २० गते २१:२३

काठमाडौं । एसोसिएट क्रिकेटका परिचित खेलाडी रोहन मुस्तफाले नेपाल प्रिमियर लिग (एनपीएल)मा सुदूरपश्चिम रोयल्सबाट खेल्ने भएका छन् ।

यूएईबाट अन्तर्राष्ट्रिय क्रिकेट खेल्दै आएका रोहन नेपाली समर्थकका लागि परिचित अनुहार हुन् । उनले यसअघि पनि नेपालका विभिन्न फ्रेन्चाइज प्रतियोगिता खेलिसकेका छन् ।

यूएईको कप्तानसमेत गरिसकेका ३६ वर्षीय रोहनले एकदिवसीय र टी–२० अन्तर्राष्ट्रिय क्रिकेटमा उत्कृष्ट अलराउन्ड प्रदर्शन गर्दै आएका छन् । बायाँहाते ब्याटर रोहनले ५८ टी–२० अन्तर्राष्ट्रिय क्रिकेटमा एक हजार माथि रन जोड्नुका साथै २१ को औसतमा ६१ विकेट पनि लिएका छन् । 

एकै ओडीआईमा शतक प्रहार गर्नुका साथै पाँच विकेट लिने दुर्लभ कीर्तिमान पनि उनको नाममा छ । 

रोयल्सले यसअघि विदेशी खेलाडीको रूपमा न्युजिल्यान्डका बलिङ अलराउन्डर स्कट कुगेलेइन, स्कटल्यान्डका अलराउन्डर ब्रान्डन मक्मलेन र इंग्लिस क्रिकेटर सेफ अलि जेबलाई अनुबन्ध गरिसकेको छ ।

त्यस्तै, अस्ट्रेलियाका विश्वकप विजेता पूर्वक्रिकेटर ब्राड हजलाई प्रमुख मेन्टरमा छन् । दीपेन्द्र सिंह ऐरी मार्की खेलाडी रहेको सुदूरपश्चिम रोयल्सको मुख्य प्रशिक्षकमा जगत टमाटा छन् ।

रोयल्सले आइकोनिक खेलाडी टोलीमा समेट्न खुला छनोट पनि गर्दै छ । रोयल्सले कात्तिक २८ गते गर्ने ट्यालेन्ट हन्टबाट एक आइकोनिक खेलाडी र चार सूदुरपश्चिम हिरोज छनोट गर्ने छ । छनोट कार्यक्रम धनगढीमा हुने छ । आइकोनिक खेलाडी रोयल्सको एनपीएल टोलीमा समावेश हुनुका साथै चार हिरोज पनि टोलीसँग रहेर नै प्रशिक्षणमा सहभागी हुने छन् । छनोटका लागि रोयल्सले सुदूरपश्चिम प्रादेशिक क्रिकेट संघसँग समन्वय गरिरहेको छ ।

नेपाल क्रिकेट संघ (क्यान)को आयोजनामा आठ टोलीको सहभागितामा मंसिर १६ गतेदेखि एनपीएल सुरु हुँदै छ ।

प्रतिक्रिया