काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीले आफुलाई विभिन्न पार्टीका नेताहरुले विना आधार आरोप लगाउने गरेको बताएका छन् ।

शुक्रबार दरबारमार्गमा आयोजित जागरण सभालाई सम्बोधन गर्दै प्रधानमन्त्री ओलीले यस्तो बताएका हुन् ।

ओलीले अमेरिकाको बैंकको आधा सम्पत्ति मेरै हो भन्दै ठट्टा गरेका छन् । ‘केही पार्टीका नेताहरु भन्छन् – यसको कम्बोडियामा लगानी छ, स्वीस बैंकमा पैसा छ, भन्दिए भो, हेर्न जाने होइन’, उनले भने, ‘त्यो मात्रै किन अमेरिकाका बैंकको आधा सम्पत्ति मेरै हो । यस्तो फाल्तु कुरा गरेर काम छैन ।’

ओलीले मुलुकको अर्थतन्त्र र मौद्रिक नीतिलाई खलबल्याउन कम्बोडियाको टेलिकममा आफ्नो लगानी रहेको अफवाह फैलाइएको स्पष्ट पारे ।