काठमाडौं । परराष्ट्रमन्त्री डा. आरजु राणा देउवा स्वदेश फर्किएकी छन् । चीनको तीन दिने औपचारिक भ्रमण सकेर परराष्ट्रमन्त्री राणा भर्खरै त्रिभुवन अन्तर्राष्ट्रिय विमानस्थल अवतरण गरेकी हुन् । 

नेपाली प्रतिनिधिमण्डलको नेतृत्व गर्दै बिहीबार चीनको सिचुआन प्रान्तस्थित छन्दु पुगेकी उनले शुक्रबार अपराह्न चिनियाँ विदेशमन्त्रीसँग द्विपक्षीय भेटवार्ता गरेकी थिइन् । सो अवसरमा उनीहरूबीच नेपाल–चीन सम्बन्ध र द्विपक्षीय हितका विविध पक्षका साथै प्रधानमन्त्री केपी शर्मा ओलीको आसन्न चीन भ्रमणको तयारीका बारेमा कुराकानी भएको थियो । 

आज विमानस्थलमा सञ्चारकर्मीहरूसँग कुरा गर्दै मन्त्री राणाले चिनियाँ विदेशमन्त्रीसँग आर्थिक तथा सामाजिक समझदारी कायम राख्ने विषयमा छलफल भएको बताइन् । यस्तै विगतमा भएका सहमतिलाई अगाडि बढाउने विषयमा कुरा भएको उनले बताइन् । उनले नेपाली पक्ष ऋण लिनसक्ने पक्षमा नभएको भन्ने कुरा पनि चिनियाँ विदेशमन्त्री समक्ष राखेको बताइन् । प्रधानमन्त्री ओली आगामी सोमबार चीनको औपचारिक भ्रमणमा जाँदैछन् । परराष्ट्रमन्त्री राणा प्रधानमन्त्री ओलीको चीन भ्रमणमा पनि सहभागी हुनेछिन् ।