काठमाडौं । जिल्लाको टोखा नगरपालिकाले ‘नगर गौरव सम्मान’ ग्रान्डी अन्तर्राष्ट्रिय अस्पताल धापासीलाई प्रदान गरेको छ । टोखाले ११औँ नगर स्थापना दिवसका अवसरमा नेपालको स्वास्थ्य क्षेत्रमा उत्कृष्ट कार्य गरी टोखालाई देश–विदेशमा चिनाउन महत्वपूर्ण भूमिका खेलेको भन्दै ग्रान्डी अस्पताललाई सम्मान प्रदान गरेको हो ।

उक्त सम्मान आज नगरप्रमुख प्रकाश अधिकारीले अस्पतालका अध्यक्ष इन्जिनियर दीपक कुँवरलाई प्रदान गरे । सम्मान प्रदान गर्दै नगरप्रमुख अधिकारीले समृद्ध टोखा निर्माणमा महत्वपूर्ण भूमिका प्रदान गरेका व्यक्ति तथा संस्थालाई सम्मान गरिएको जानकारी दिए ।

उनले आगामी दिनमा पनि सम्मानित सङ्घसंस्थाले टोखाको विकास र समृद्धिमा महत्वपूर्ण भूमिका खेल्ने विश्वास व्यक्त गरे ।त्यस अवसरमा सगरमाथा आरोही सुवेर श्रेष्ठ, वरिष्ठ साहित्यकार नयनराज पाण्डेय, वरिष्ठ हास्य कलाकार सन्तोष पन्त, औषधि उद्योग देउराली जनता फर्मास्युटिकल्सलाई सम्मान गरेको छ ।

यसैगरी, टोखामा बसोबास गरी विभिन्न विषयमा विद्यावारीधि हासिल गर्ने ३३ जनालाई सम्मान गरेको छ । ओलम्पियन अर्जुन पण्डित, गिनिज वल्र्ड रेकर्ड साजन डङ्गोल, महिला राष्ट्रिय क्रिकेट खेलाडी खुशी डङ्गोललाई समेत सम्मान गरिएको नगरपालिकाले जनाएको छ ।