काठमाडौँ । विभिन्न जिल्लामा ६ जना मृत अवस्थामा फेला परेका छन् । सुनसरी, दाङ, धनुषा लगायतका जिल्लामा ६ जना मृत अवस्थामा फेला परेका हुन् । सुनसरीको रामधुनी नगरपालिका–७ स्थित लटर होली तालमा सोही ठाउँ बस्ने ७२ वर्षीय भद्र लिम्बु आइतबार मृत अवस्थामा फेला परेका छन् ।

त्यस्तै दाङको गढवा गाउँपालिका–६ स्थित पानी भएको कल्भर्टमा सोही गाउँपालिका–६ सर्वोदय चोक बस्ने ६५ वर्षीया ढोढी कुमाल मृत अवस्थामा फेला परेकी छिन् । उनी आइतबार मृत फेला परेकी हुन् ।

उता धनुषाको जनकपुरधाम उपमहानगरपालिका–१६ महुवा टोलस्थित महुवा महादेव मन्दिर नजिकै बाटो छेउमा सोही उपमहानगरपालिका–१६ कपिलेश्वर बस्ने ७० वर्षीय नरेश यादव सोमबार मृत अवस्थामा फेला परेका छन् ।

त्यसैगरी अर्घाखाँचीको शितगंगा नगरपालिका–३ ठाडा डेरा गरी बस्ने कपिलवस्तु नगरपालिका–७ हरीपुर घर भएका ३३ वर्षीय गणेश सिंह आफ्नै कोठामा मृत अवस्थामा फेला परेका छन् । उनी सोमबार मृत फेला परेका हुन् ।

त्यस्तै सोमबार दोलखाको गौरीशंकर गाउँपालिका–४ बस्ने ३५ वर्षीय ओम्बा छिरीङ शेर्पा सोही गाउँपालिका–४ किस्पानस्थित सडक नजिकै मृत अवस्थामा फेला परेका छन् ।

यता पर्साको वीरगंज महानगरपालिका–१७ स्थित खेतमा हाल नाम, थर, वतन नखुलेका अन्दाजी २५ वर्षीय पुरूष आइतबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान भैरहेको जानकारी दिएको छ ।