मुम्बई। ‘टाइगर– ३’ पछि सलमान खान फेरि एक दमदार एक्शन फिल्म लिएर आउँदैछन् । उनको फिल्म ‘सिकन्दर’ २०२५ मा रिलिज हुँदैछ । 

गजनी र होलिडेका लागि चर्चित एआर मुरुगादासले सिकन्दरलाई निर्देशन गर्दैछन्। फिल्म रिलिज हुन अझै धेरै समय बाँकी छ तर हालै फिल्मको एक्सन प्याक टिजर रिलिज भएको छ, जुन अहिले बलिउडको नम्बर १ टिजर बनेको छ ।

‘सिकन्दर’को टिजर तीन दिनअघि युट्युबमा सार्वजनिक गरिएको थियो। सलमानको लुक र ब्याकग्राउण्ड म्युजिकका साथै कलर ग्रेडिङ र अन्य पक्षलाई दर्शकले निकै मन पराइरहेका छन् ।

तथ्याङ्क अनुसार सिकन्दरको टिजर युट्युबमा पहिलो २४ घण्टामा सबैभन्दा धेरै हेरिएको बलिउड टिजर बनेको छ । डिसेम्बर २८ मा साँझ ४ः०५ बजे रिलिज भएको यो टिजरले पहिलो २४ घण्टामा स्ट्रिमिङ प्लेटफर्ममा ४१.६ मिलियन भ्युज पाएको छ। यसले शाहरुख खानको डंकीलाई पछि पार्दै कीर्तिमान बनाएको छ ।

डङ्कीको टिजर ३६.८ मिलियन पटक हेरिएको छ । तर, ४१.६ मिलियन भ्युजको साथ सिकन्दरको टिजरले पनि पहिलो २४ घण्टामा ७२१ हजार लाइक पाएको छ ।