काठमाडौं । पूर्वप्रधानमन्त्री एवं नेकपा (एकीकृत समाजवादी)का सम्मानित नेता झलनाथ खनालले बेल्ट एन्ड रोड एनिसिएटिभ (बीआरआई) परियोजनाअन्तर्गत ऋण लिनै हुँदैन भन्नु थोत्रो अवधारणा भएको टिप्पणी गरेका छन् ।

बुधबार काठमाडौंमा आयोजित एक कार्यक्रममा बोल्दै उनले यस्तो बताएका हुन् । ‘यो ऋण लिनै हुँदैन, अनुदान मात्रै लिनुपर्छ भन्नेखालका जुन अवधारणाहरु हुन्, यी अवधारणा भनेका आफैँमा थोत्रा अवधारणा हुन्। यो चिन्तन गर्न नसक्ने, भिजन क्रिएट गर्न नसक्ने, विषयवस्तुलाई बुझ्न नसक्ने र आफ्नै देशको राष्ट्रिय आवश्यकतालाई बुझ्न नसक्ने मानिसहरुका कुरा मात्रै हुन्,’ उनले भने।

नेता खनालले अहिले प्रधानमन्त्री केपी शर्मा ओलीले बीआरआई फ्रेमवर्क एग्रिमेन्ट गरेको भन्दै अब परियोजनाअन्तर्गत नयाँ योजनाहरू ल्याउन सकिने सम्भावना रहेको उल्लेख गरे । उनले अझै गहन छलफल गरेर बौद्धिक व्यक्तिका सुझाव लिएर देशको हितमा योजनाका प्रस्तावहरू चीनसँग लैजानुपर्ने बताए ।