काठमाडौँ । जिल्ला अदालत काठमाडौंको परिसर बाहिर वरिष्ठ अधिवक्ता दिनेश त्रिपाठीमाथि कुटपिट गर्ने व्यक्तिलाई प्रहरीले सार्वजनिक गरेको छ।

जिल्ला प्रहरी परिसर काठमाडौंले पक्राउ परेका व्यक्तिलाई सार्वजनिक गरेको हो।

पक्राउ पर्नेमा ललितपुरको महालक्ष्मी नगरपालिका-५ टिकाथली बस्ने ४८ वर्षीय ललितकुमार केसी रहेको परिसरका एसपी नवराज अधिकारीले जानकारी दिए।

उनीसहितका व्यक्तिहरूले बुधबार पौने ४ बजेतिर दक्षिण गेट बाहिर जेब्रा क्रसिङबाट सडक पार गर्नेक्रममा कुटपिट भएको हो।

प्रहरीले केसीलाई पक्राउ गरेको भएपनि अन्यको खोजी भइरहेको प्रहरीले जनाएको छ। 

पक्राउ परेका केसीमाथि ज्यान मार्ने उद्योग कसुरमा काठमाडौं जिल्ला अदालतमा म्याद थप भएको हो। 

प्रहरी वृत्त सिंहदरबारले घटनाको थप अनुसन्धान अघि बढाएको छ।