वासिङ्टन। अमेरिकी राष्ट्रपति डोनाल्ड ट्रम्पले बुधबार गाजामा युद्धरत प्यालेस्टिनी समूहलाई बन्धक त्याग्न वा ‘नरक’को सामना गर्न तयार रहनुपर्ने चेतावनी बुधबार राति दिएका छन् । उनले हमास लडाकु समूहको नेतृत्वलाई गाजा क्षेत्र खाली गर्न पनि निर्देशन दिएका छन् ।

ट्रम्पले आफ्नो ट्रुथ सोसल प्लाटफर्ममा गरेको पोस्टमा भनेका छन्, ‘सही निर्णय लिनुहोस्। बन्धकहरूलाई अहिले नै छोडिदिनुहोस्, नत्र पछि यसको परिणाम नरक हुनेछ ’ उनले भनेका छन्, ‘गाजाका जनताका लागि एक सुन्दर भविष्यले पर्खिरहेको छ, तर यदि तपाईंले बन्धकहरू रिहा गर्नुभएन भने त्यो सम्भव हुने छैन ।’ सोही पोस्टमा अमेरिकी नेताले हमासलाई भनेका छन्, ‘सबै बन्धक र तपाईंले हत्या गरेका मानिसहरूका सबै शवहरू पछि होइन तुरुन्तै अहिले नै फिर्ता गर्नुहोस्।’

‘यो तपाईंको लागि अन्तिम चेतावनी हो ! हमाससँग अझै पनि अवसर छ त्यो हो यसले अब गाजा छोड्ने समय आएको छ,’ उनले लेखेका छन्। उनले अगाडि लेखेका छन्, ‘म इजरायललाई आफ्नो काम पूरा गर्न आवश्यक पर्ने सबै कुरा पठाउँदै छु, यदि तपाईंले मैले भनेजस्तो गर्नुभएन भने हमासका कुनै पनि सदस्य सुरक्षित हुनेछैनन् ।’

सन् २०२३ को अक्टोबर ७ मा हमासले इजरायलमाथि गरेको आकस्मिक आक्रमणमा पक्राउ परेकामध्ये पाँचजना अमेरिकी पनि रहेको विश्वास गरिएको छ । तीमध्ये चारजनाको मृत्यु भएको पुष्टि भएको छ भने अर्का एकजना एडान अलेक्जेन्डर जीवितै रहेको बताइएको छ ।

इजरायली जेलमा रहेका प्यालेस्टिनी कैदीहरूका लागि इजरायली बन्धकहरूको आदानप्रदानसहित ६ हप्ताको सापेक्षिक शान्तिपछि युद्धविरामको पहिलो चरण गत सप्ताहन्तमा समाप्त भएको थियो। इजरायलले पहिलो चरण अप्रिलको मध्यसम्म लम्ब्याउन चाहेको बताइरहँदा हमासले भने दोस्रो चरणमा प्रवेश गर्नुपर्नेमा जोड दिएको छ।

अमेरिकासँग प्रत्यक्ष वार्ता

हमासका अधिकारीहरूले बुधबार गाजामा बन्धक बनाइएका व्यक्तिलाई मुक्त गर्ने सम्बन्धमा अमेरिकी दूतसँग प्रत्यक्ष वार्ता गरेको बताएका छन्। ‘हमास र विभिन्न अमेरिकी सञ्चार च्यानलबिच धेरपटक कुराकानी भएको र पछिल्लोपटक इजरायलका लागि अमेरिकी राजदूतसँग वार्ता भएको छ र अमेरिकी नागरिकता लिएका इजरायली जीवित र मृतक दुवै कैदीको विषयमा छलफल भएको छ,’ हमासका एक अधिकारीले नाम नबताउने सर्तमा भने ।

हमासका अन्य वरिष्ठ अधिकारीले ‘हालैका दिनमा दोहामा हमास र अमेरिकी अधिकारीबिच दुईपटक प्रत्यक्ष बैठक भएको’ पुष्टि गरेका छन् ।