काठमाडौं । बागमती अटो–जिमखाना च्याम्पियनसिप तथा टीडीएस (टाइम–डिस्ट्यान्स–स्पिड) मोटर र्याली असार १४ गते शनिबार बनेपास्थित चण्डेश्वरी ड्राइभिङ स्कूलमा भव्यताका साथ सम्पन्न भएको छ ।

बागमती अटोमोबाइल्स एसोसिएसनको संयोजनमा मोटोभर्स स्पोट्र्स क्लब र जियोन ओभरल्याण्डको आयोजनामा भएको यो प्रतियोगिताले मोटरस्पोट्र्सप्रेमीहरूलाई रोमाञ्चक अनुभव प्रदान गरेको थियो । नेपाल अटोमोबाइल्स एसोसिएसन (नासा नेपाल) को प्राविधिक सहयोग र बागमती प्रदेश खेलकुद विकास परिषदको आर्थिक सहयोगमा आयोजित यस इभेन्टमा ३२ गाडीसहित ६१ जना ड्राइभरहरूले सहभागिता जनाएका थिए ।

यो च्याम्पियनसिपले दुई प्रमुख विधाहरू समावेश गरेको थियोः अटो–जिमखाना र टीडीएस मोटर र्याली । अटो–जिमखानामा ड्राइभरहरूले आफ्नो ड्राइभिङ कौशल, गति र सटीकताको प्रदर्शन गरे भने टीडीएस र्यालीमा समय, दूरी र गतिको संयोजनमा आधारित रणनीतिक ड्राइभिङको कला प्रस्तुत गरिएको थियो । प्रतियोगितामा पुरुष र महिला दुवै वर्गका ड्राइभरहरूले उत्साहजनक प्रदर्शन गरेका थिए । यसैगरी अटो–जिमखानामा कुल २३ जना ड्राइभरहरूले प्रतिस्पर्धा गरेका थिए, जसमा पुरुषतर्फ १७ र महिलातर्फ ६ जना सहभागी थिए । क्वालिफाइङ राउण्डपछि पुरुषतर्फ शीर्ष ८ ड्राइभरहरू फाइनल चरणमा पुगे भने महिलातर्फ सबै ६ जना ड्राइभरहरू फाइनलमा प्रवेश गरेका थिए ।

पुरुषतर्फः आशिष भारतीले क्वालिफाइङ र फाइनल दुवै चरणमा उत्कृष्ट प्रदर्शन गर्दै च्याम्पियनसिपको उपाधि जिते भने राजकुमार कार्की दोस्रो स्थानमा र विप्लक श्रेष्ठले तेस्रो स्थान हासिल गर्न सफल रहे । आशिषले नगद १ लाख, दोस्रो स्थानका राजकुमारले ५० हजार र तेस्रो स्थानका विप्लकले ट्रफी, सर्टिफिकेट र गिफ्ट ह्याम्पर प्राप्त गरे ।

महिलातर्फः क्वालिफाइङ चरणमा विपाश्ना तामाङ शीर्ष स्थानमा रहिन्, तर फाइनलमा वर्षा बस्नेतले उत्कृष्ट समय निकाल्दै बेस्ट फिमेल ड्राइभर अवार्डसहित उपाधि जित डिक्लेरेसनः आशिष भारती र वर्षा बस्नेतले बागमती अटो–जिमखाना च्याम्पियनसिपको उपाधि जितेका छन् । वर्षाले बेस्ट फिमेल ड्राइभर अवार्डसहित नगद ५० हजार, सिल्ड, सर्टिफिकेट र गिफ्ट ह्याम्पर प्राप्त गरिन् ।

टीडीएस मोटर र्याली ललितपुरको रोयल टुलिप, ग्वार्कोबाट सुरु भई लुभू, लाकुरी भञ्ज्याङ, कुशादेवी, पनौती हुँदै बनेपाको चण्डेश्वरी ड्राइभिङ स्कूलमा सम्पन्न भएको थियो । यो र्यालीमा ड्राइभर र सह–ड्राइभरको जोडीले समय, दूरी र गतिको सन्तुलन कायम राख्दै प्रतिस्पर्धा गरेका थिए । जहाँ प्रबेश पौडेल र प्रदीप पौडेलको जोडीले प्रथम स्थान हासिल गर्दा विप्लक श्रेष्ठ र राजन गिरी दोस्रो भए । यसैगरी पुजा पाख्रिन र नविन लामा तेस्रो भए ।

सबै विजेताहरूलाई शिल्ड, प्रमाणपत्र र गिफ्ट ह्याम्पर प्रदान गरिएको थियो । र्यालीको औपचारिक शुभारम्भ राष्ट्रिय खेलकुद परिषद्का सदस्य रामचन्द्र श्रेष्ठ, नासा नेपालका अध्यक्ष दशरथ रिसाल, सल्लाहकार ठाकुर प्रसाद न्यौपाने र कोशी अटोमोबाइल्स एसोसिएसनका अध्यक्ष प्रकाश कपुरीले संयुक्त रूपमा गरेका थिए ।

अटो–जिमखानाका विजेताहरूले श्रीलंका, ताइवान र भारतमा आयोजना हुने एसिया अटो–जिमखाना च्याम्पियनसिप र एसिया प्यासिफिक मोटर स्पोर्ट च्याम्पियनसिपमा सहभागिता जनाउने अवसर प्राप्त गर्नेछन् । विजेताहरूले प्राप्त गरेको पुरस्कार रकम यी अन्तर्राष्ट्रिय प्रतियोगिताहरूमा सहभागिताको प्याकेजका लागि प्रयोग गरिनेछ ।

गत वर्ष थाइल्याण्डको बैंककमा भएको एसियन कप अफ सर्किट रेसिङ च्याम्पियनसिपमा सहभागी नितिका गजुरेललाई कोशी प्रदेश खेलकुद विकास बोर्ड र कोशी अटोमोबाइल्स एसोसिएसनको तर्फबाट ५० हजार नगदसहित सम्मान गरिएको थियो ।

बागमती अटो–जिमखाना च्याम्पियनसिप तथा टीडीएस मोटर र्याली २०८२ ले नेपालको मोटरस्पोट्र्स क्षेत्रमा नयाँ आयाम थपेको छ । आशिष भारती र वर्षा बस्नेतको उत्कृष्ट प्रदर्शन, प्रबेश र प्रदीप पौडेलको रणनीतिक विजय र समग्रमा ६१ जना ड्राइभरहरूको सहभागिताले यो इभेन्टलाई अविस्मरणीय बनाए । यो प्रतियोगिताले नेपाली मोटरस्पोट्र्सलाई अन्तर्राष्ट्रिय मञ्चमा चिनाउने आधार तयार गरेको छ, र आगामी दिनमा यस्ता इभेन्टहरूले थप युवाहरूलाई यो रोमाञ्चक खेलप्रति आकर्षित गर्ने अपेक्षा गरिएको छ ।