सिरहा। सिरहामा दुई क्विन्टलभन्दा बढी गाँजासहित एक जना युवक पक्राउ परेका छन् ।

औरही गाउँपालिका–५ स्थित मलाह टोलबाट दुई क्विन्टलभन्दा बढी अवैध लागुऔषध गाँजासहित स्थानीय २३ वर्षीय राम उदगार मलाह पक्राउ परेका हुन् । प्रहरीका अनुसार विशेष सूचनाका आधारमा लागुऔषध गाँजा बोक्दै गरेको अवस्थामा मलाहलाई नियन्त्रणमा लिइएको हो ।

सूचना अधिकारी पासवानका अनुसार मलाहलाई प्र २–०१–००३प २१५४ नम्बरको मोटरसाइकलसहित नियन्त्रणमा लिइएको हो । उनलाई पक्राउ गर्ने क्रममा प्रहरीले सातवटा पोकामा राखिएको २१२ किलो ९२५ ग्राम गाँजा फेला पारेको हो ।

घटनाबारे थप अनुसन्धान भइरहेको प्रहरीले जनाएको छ ।