काठमाडौं ।तिब्बती बौद्ध परम्परामा दोस्रो बुद्धको रुपमा चिनिने गुरु पद्मसम्भव (गुरु रिन्पोछे)को जन्म दिवस ‘छेच्यु’ तथा बौद्ध धर्मका धर्मपाल मानिने महाकालको जात्रा विविध धार्मिक र सांस्कृतिक कार्यक्रमका साथ मनाइने भएको छ ।

शुक्रबार पत्रकार सम्मेलन आयोजना गर्दै बौद्धनाथ क्षेत्र विकास समितिले गुरु रिन्पोछेको जन्म दिवसको अवसरमा साउन १९ गते बिहान ९ बजेबाट बौद्ध महाचैत्य आसपासका विभिन्न स्थलहरू महाकाल, तीनचुली र घ्योइलिसाङ पोखरी (गुरु पार्क)मा विशेष पूजाअर्चना गरिने जानकारी दियो।

सोहीदिन दिउँसो ३ बजे तीनचुलीबाट गुरु रिन्पोछेको प्रतिमासहित निकालिने, शोभायात्राले बौद्ध महाचैत्यको परिक्रमा गरेपछि गुरु रिन्पोछेको आठ लीला झल्काउने ‘गुरु छेड्गे छ्याम’ धार्मिक नृत्य प्रस्तुत गरिनेछ ।

यस्तै महाकाल जात्राको परम्परागत थालनी गर्दै साउन २७ गते दुइहाते महाकालको जात्रा पनि गरिने समितिले जनाएको छ ।

महाकालको पूजा लामा, बज्राचार्य र ब्राह्मण गुरुहरुद्वारा गरिनेछ । महाकालको प्रतिमालाई खटमा राखी रामहिटी, तीनचुली, बौद्ध, टुसाल, चुच्चेपाटी हुँदै पुनः महाकाल स्थानमा फर्काइनेछ ।

११ बजेदेखि सुरु हुने जात्रामा शार्दूल जंग गुल्म (गुरुजु पल्टन)ले हर्ष बढाइ कार्यक्रम प्रस्तुत गर्ने समितिले जनाएको छ ।