काठमाडाैं । गोरखाबाट चितवनतर्फ जाँदै गरेको यात्रुबाहक बस दुर्घटना हुँदा पाँचजना घाइते भएका छन् ।

ग २ ख १०७७ नम्बरको बस आइतबार अपरान्ह चारबजेतिर तनहुँको आँबुखैरेनी गाउँपालिका-२ ऐनापहरास्थित पृथ्वी राजमार्ग सडकबाट करिब १५ मिटर तल खस्दा बसमा सवार पाँचजना घाइते भएको प्रहरीले जानकारी दियाे ।

दुर्घटनामा सहिदलखन गाउँपालिका- ६ की ४० वर्षीया सुनु थापा, सहिद लखन- ६ रानीस्वाँराकी ४३ वर्षीया सीता थापा, सोही ठाउँकी २८ वर्षीया मीना थापा, गोरखा नगरपालिका- ९ का ५४ वर्षीय सनबहादुर गुरुङ र आँबुखैरेनी गाउँपालिका- १ गिरानचौरका ७ वर्षीय खुशी राम रामदाम घाइते भएका छन् ।

घाइतेमध्ये गम्भीर अवस्थामा रहेकी सोनुलाई भरतपुर रिफर गरिएको प्रहरीले जनाएकाे छ ।