काठमाडौं । भारतको उत्तराखण्ड अन्तर्गत उत्तरकाशीको हर्षिल क्षेत्रमा आरीघोप्टे (क्लाउडबर्स्ट) वर्षापछि आएको भीषण बाढीले बस्ती नै बगाएकाे छ ।

भारतीय मिडिया दैनिक भास्करका अनुसार बाढीमा परी अहिलेसम्म ४ जनाको मृत्यु भएको छ भने अन्य ५० जना बेपत्ता भएका छन् ।

हर्षिलस्थित भारतीय सेनाको शिविरबाट करिब ४ किलोमिटर टाढा रहेको उत्तरकाशीको धराली गाउँमा आरीघोप्टे वर्षापछि खीर गढ नालीमा मंगलबार दिउँसो भीषण बाढी आएको हो । यहाँ विगत २ दिनदेखि लगातार ठूलो पानी परिरहेको थियाे।

उत्तराखण्डका मुख्यमन्त्री पुष्कर सिंह धामीले सामाजिक सञ्जालमार्फत घटनाप्रति दुःख व्यक्त गरेका छन् । उनले आफूहरु परिस्थितिमा नजर राखिरहेकाे बताएका छन् ।