काठमाडौँ । नाडा अटो शो २०२५ आजदेखि भृकुटीमण्डपमा सुरु भएको छ । प्रदर्शनीको पहिलो दिन नै दिपलकाे उड्ने कार सार्वजनिक भएकाे छ ।

याे कार हेर्न उपभोक्ताको घुइँचो लागेको छ । बिहानैदेखि प्रदर्शनीस्थलमा पुगेका दर्शकहरू कार वरिपरि घेरा हालेर झुम्मिएका थिए ।

चीनको चांगन अटोमोबाइलले ईह्याङ कम्पनीसँग साझेदारीमा उत्पादन गरेको यो उड्ने कार नेपालमा पहिलोपटक सार्वजनिक प्रदर्शनका लागि ल्याइएको हो ।

पूर्णतया इलेक्ट्रिक यो दुई सिटे कार eVTOL प्रविधिमा आधारित छ । यसमा मल्टी–प्यारासुट सुरक्षा प्रणाली जडान गरिएको छ, जसले आपतकालीन अवस्थामा यात्रुको सुरक्षामा सहयोग पुर्‍याउने बताइएको छ ।

एकपटक चार्ज गरेपछि करिब ३० किलोमिटर सम्म उड्न सक्ने यो कारको गति प्रति घण्टा करिब १३० किलोमिटर भएकाे बताइएकाे छ ।

दिपल उप–ब्रान्ड अन्तर्गत एमएडब्लू वृद्धि अटो कर्प प्रालिले यसलाई चीनबाट तातोपानी नाका हुँदै काठमाडौं ल्याएको हो ।

यद्यपि नेपालमा संचालन अनुमति नपाएकाले अहिले प्रदर्शनका लागि मात्र ल्याइएको कम्पनीले स्पष्ट पारेको छ । हाल यसकाे मूल्यबारे पनि बताइएको छैन।

अमेरिका, चीन, कोरिया र यूएईलगायतका मुलुकमा परीक्षण उडान भइसकेको यो कार नेपालमा भने अहिलेको लागि प्रदर्शनकै मुख्य आकर्षण बनेको छ ।