काठमाडौं । भारतको बिहार प्रदेशसँग सिमा जाेडिएका नेपालका पाँच प्रदेशका सशस्त्र प्रहरी बलका डिआइजी बुधबार बिहारमा भेला भए । बिहारसँग सिमा जोडिएका काेशी प्रदेश, मधेस, बागमती, गण्डकी र लुम्बिनी प्रदेशका सशस्त्र प्रहरीका डिआइजी बिहार प्रदेश सरकार र त्यहाँको एसएसबीको निमन्त्रणामा बिहारमा भेला भएका हुन् ।

बिहारमा हुन गइरहेको विधानसभा निर्वाचनलाई मध्यनजर गर्दै सशस्त्र प्रहरीका ति डिआइजीलाई विरगञ्जपारी बिहारकाे क्षेत्रमा आयोजित भेलामा निमन्त्रणामा गरेको एक डिआइजीले जानकारी दिए । त्यस्तै बिहारसँग सीमा जोडिएका नेपालका जिल्लाका सशस्त्र प्रहरी बलका एसपीलाई समेत निमन्त्रणामा गरिएको उनले जानकारी दिए । भेलामा भारततर्फका सुरक्षा अधिकारीहरुकाे पनि बाक्लाे उपस्थिति रहेको थियाे ।

बिहारमा कात्तिक २० र २५ गते विधानसभाको निर्वाचन हुँदैछ । अमेरिकी प्रभावमा सुशीला कार्की नेतृत्वकाे सरकार गठन भएकाे आलोचना भइरहेको सन्दर्भमा भारतले सशस्त्र प्रहरी बललाई निमन्त्रणामा गर्नुलाई समेत अर्थपूर्ण रुपमा हेरिएकाे छ ।

विशेषत जेनजी आन्दोलनका क्रममा लुटिएका हतियार र जेलबाट भागेका कैदी बिहारकाे निर्वाचनमा दुरुपयोग नहाेस् भनेर भारतीय पक्षले विशेष चाँसो राखेको सशस्त्रका ति डिआइजीले जानकारी दिए । निर्वाचन अवधिभर सिमामा निगरानी, गस्ती , पेट्रोलिङ, सतर्कता बढाइदिन भारतिय पक्षले विशेष आग्रह गरेको थियो । त्यसका लागि सशस्त्र प्रहरी बलकाे विशेष सहयोगकाे अपेक्षा आफुहरुले गरेको भारतीय पक्षको भनाइ थियो ।