काठमाडाैं । माओवादी केन्द्र परित्याग गरि नयाँ अभियान घोषणा गरेका नेता जनार्दन शर्माले माओवादी केन्द्रका संयोजक पुष्पकमल दाहाल ‘प्रचण्ड’ले नेकपा एकीकृत समाजवादीका अध्यक्ष माधव नेपालको नीतिमा आत्मसमर्पण गरेको आरोप लगाएका छन्।

मंगलबार ललितपुरमा पत्रकार सम्मेलन गर्दै आफूूहरुले त्यसलाई स्वीकार नगरेको र नयाँ अभियान घोषणा गरेको जानकारी दिए। ‘हाम्रो अध्यक्ष प्रचण्ड माओवादी पार्टी छाडेर माधव नेपालजीको नीतिमा आत्मसमर्पण गर्नुभयो,’ शर्माले भने, ‘उहाँ उतै जानु भयो। हामीले त्यो कुरालाई स्वीकार गरेनौँ।’

उनले आफूले नेतृत्वको दाबी नगर्ने र नवपुस्तालाई अगाडि बढाउने बताएका छन् । ‘हामीभन्दा पछाडिको पुस्तालाई नेता बनाउने हो । हाम्रो अनुभव दिने । भिन्न दृष्टिकोणबाट पार्टी अगाडि बढाउने हो ।’

उनले नेकपा गठनको बेला बृहत् राजनीति एकता गर्ने र समृद्धिको आधार तय गर्ने भएकै हुनाले आफू त्यो पक्षमा उभिए पनि नेताको स्वार्थले कुर्सीका लागि विघटन गरिको बताए ।