शनिबार, मंसिर १३, २०८२

हुवावेको ‘वाच जीटी ६ सिरिज’ नेपालमा सार्वजनिक

मेरोन्यूज २०८२ मंसिर १२ गते १८:१६

काठमाडौं । हुवावेले नेपालमा आफ्नो नयाँ हुवावे वाच जीटी ६ सिरिज औपचारिक रूपमा सार्वजनिक गरेको छ, जसअन्तर्गत हुवावे वाच जीटी छ तथा हुवावे वाच जीटी छ प्रो मोडेल समावेश छन्।

टिकाउपन, स्पष्ट प्रदर्शन र दीर्घ ब्याट्री क्षमतामा केन्द्रित यस नयाँ श्रृंखलाले नेपाली स्मार्टवाच बजारमा आधुनिक प्रविधि र नयाँ मापदण्ड स्थापित गरेको छ।

हुवावे वाच जीटी ६ छयालिस मिलिमिटर र एकचालिस मिलिमिटर दुवै आकारमा उपलब्ध छ। यसमा ३ हजार निट्ससम्मको ब्राइटनेससहितको एमओएलइडी स्क्रिन र परिष्कृत स्टेनलेस स्टिल डिजाइन प्रदान गरिएको छ। मोडेलनुसार १४ दिनदेखि २१ दिनसम्म चल्ने लामो ब्याट्री लाइफ यस सिरिजको मुख्य आकर्षण हो।

हुवावे वाच जीटी ६ को मूल्य भेरियन्टअनुसार ३४ हजार ४ सय ९० देखि ३९ हजार ४ सय ९० सम्म निर्धारण गरिएको छ। यस्तै, प्रिमियम निर्माणसहितको हुवावे वाच जीटी ६ प्रो ५४ हजार ४ सय ९० देखि ७४ हजार ४ सय ९० सम्म उपलब्ध छ। प्रो भेरियन्ट खरिद गर्ने उपभोक्ताले ५ हजार ४ सय ९० मूल्य बराबरको हुवावे बड्स एसई २ उपहारस्वरूप प्राप्त गर्नेछन्।

दुवै मोडेलमा १ सयभन्दा बढी वर्कआउट मोड, मल्टि–जिएनएसएस पोजिसनिङ, तथा एनड्रोइड र आइओएससँग उपयोगी हुवावे हेल्थ एप मार्फत सहज कनेक्टिभिटीजस्ता सुविधाहरू समेटिएका छन्। हुवावे वाच जीटी ६ सिरिज नेपालभरका अधिकृत पुनर्विक्रेता इफिक्स नेपाल, दराज, तथा विभिन्न खुद्रा स्टोरहरूबाट उपलब्ध छ।

प्रतिक्रिया