काठमाडाैं । एनआईसी एशिया बैंकले भुक्तानी प्रणालीलाई थप सशक्त बनाउने उद्देश्यका साथ आफ्ना ग्राहकहरूलाई नेपालपे कार्ड जारी गर्न नेपाल क्लियरिङ हाउस लिमिटेड (एनसीएचएल)सँग रणनीतिक सम्झौता गरेको छ ।

उक्त सम्झौतापत्रमा बैंकका प्रमुख कार्यकारी अधिकृत सुजितकुमार शाक्य र एनसीएचएलका प्रमुख कार्यकारी अधिकृत निलेशमान सिंह प्रधानले हस्ताक्षर गरेका छन् ।

उक्त सम्झौतासँगै अब नेपाल राष्ट्र बैंकबाट भुक्तानी प्रणाली सञ्चालक (पीएसओ)को रूपमा इजाजत प्राप्त एनसीएचएलद्वारा सञ्चालित स्वदेशी कार्ड योजना (डोमेस्टिक कार्ड स्किम) अन्तर्गतको यस नेपालपे कार्ड आफ्ना ग्राहकहरूलाई जारी गर्नेछ । त्यस्तै, बैंकलाई एनसीएचएलको राष्ट्रिय कार्ड स्वीच (नेसनल कार्ड स्वीच –एनपीएस–एनसीएस) को प्रमुख साझेदारको रूपमा स्थापित पनि गरेको छ ।

यस सम्झौताले बैंकलाई नेपालको राष्ट्रिय भुक्तानी स्वीचमा पूर्ण रूपमा एकीकृत हुन मद्दत गर्नुका साथै स्वदेशी कार्डको रूपमा परिचित नेपालपे कार्ड जारी गर्न बाटो खुलाउनेछ । साथै, देशभरका पीओएस र एटीएम नेटवर्कहरूमार्फत गरिने कारोबारहरू राष्ट्रिय शुल्क संरचनाअन्तर्गत रहने सुनिश्चिततासमेत गर्ने सम्झौतामा उल्लेख छ ।

सम्झौताले बैंकका ग्राहक महानुभावहरूलाई आधुनिक, भरपर्दो र राष्ट्रिय मापदण्डको स्वदेशी कार्ड सेवाहरूमा पहुँच सुनिश्चित गरी डिजिटल बैंकिङप्रति बैंकको दृढ प्रतिबद्धतालाई टेवा दिने विश्वास गरिएको छ ।

नेपालपे कार्डमार्फत डिजिटल भुक्तानी गर्दै देशमा वित्तीय पहुँच विस्तारमा महत्त्वपूर्ण योगदान पुग्ने बैंकले विश्वास लिएको छ । साथै, डोमेस्टिक कार्ड स्किममा यस बैंकका ग्राहकहरूको सक्रिय सहभागिताले सरल र सहज बैंकिङ सेवाको पहुँच पुर्‍याउनुका साथै देशमा नगदरहित अर्थतन्त्रको विकास गर्नसमेत टेवा पुग्ने बैंकले विश्वास लिएको छ ।