काठमाडाैं । नेकपा (एमाले)को यहि शनिवारबाट ११ औं राष्ट्रिय महाधिवशेन हुँदैछ । यसपटकको महाधिवेशनको नेतृत्व चयन अलि फरक हुने देखिएकाे छ । जेनजी आन्दोलनको तीन महिनापछि हुन लागेको महाधिवेशनमा धेरै युवा नेता केन्द्रीय सदस्यको आकांक्षी रहेका छन् । पार्टी अब युवा नेताले चलाउने भन्दै धमाधम युवा नेताले उम्मेदवारी घोषणा गरिरहेका छन् ।

अनेरास्ववियुबाट राजनीतिमा गरेर यसअघिको १० औं महाधिवेशनबाट केन्द्रीय सदस्य भएकी कमला वोहरा पनि यसपटक केन्द्रीय सदस्य बन्ने तयारीमा छिन् । उनै केन्द्रीय सदस्य दोस्रो पटक बन्न खोजेकी बोहरासंग गरिएको कुराकानी:

तपाईं फेरि केन्द्रीय सदस्यमा किन दोहरिन चाहनुहुन्छ ?

हो म यसपटक फेरि केन्द्रीय सदस्यमा उम्मेदवारी दिँदैछु । म अघिल्लो १० औं महाधिवेशनको पनि केन्द्रीय सदस्य भएकोले यस पटक निरन्तरता दिनको लागि हो । मैले पहिलो कार्याकालमा सम्बोधन गर्न नसकेका युवाका मुद्दा बाँकी रहेकोले दोहरिन चाहन्छु ।

एमालेको यस महाधिवेशन नेतृत्व चयनको भनिएको छ । तर जेनजी आन्दोलनपछि मुलुक फेरि संक्रणकालिन अवस्थामा पुगेको बेला पार्टीको बिचार, नीति र सिद्वान्तमा छलफल आवश्यक छ कि छैन ?

पार्टीको बिचार, सिद्धान्त र नीति गत भदौमा सम्पन्न भएको दोस्रो विधिान महाधिवेशनले टुंग्याइसकेको छ । त्यसलगतै भएको जेनजी आन्दोलनबारे पनि पार्टीले असोज २९ देखि ३१ गतेसम्म केन्द्रीय बैठक राखेर सबै केन्द्रीय सदस्यलाई बोल्न दिइ जेनजी आन्दोलनबारे उठेका प्रश्नबारे छलफल गरिसकेको छ । अबको महाधिवेशन भनेको नेतृत्वको महाधिवेशन हो ।

एमाले जोगाउन कस्तो नेतृत्व आउनुपर्छ ?

मुलुकको राष्ट्रियता, स्वाभिमान र संविधानको रक्षाको लागि एमाले यो राष्ट्रको आवश्यक पार्टी हो । हालको विषम परिस्थितिलाई जोगाउन अध्यक्ष केपी शर्मा ओलीको नेतृत्व सग्लो र एकताबद्ध एमाले आजको आवश्यकता हो ।

पार्टीमा नेतृत्व हस्तान्तरण आवश्यकता कतिको देख्नुहुन्छ ?

यो समय नेतृत्व हस्तान्तरण भन्दा पनि चौतर्फी हमलाको डटेर सामना गर्दै दिशाहीन बनेको मुलुकको राजनीतिलाई सहि ट्रयाकमा ल्याउन अहिलेको मुल नेतृत्वलाई जोगाएर एमाले एकताबद्ध र मजबुद बनाउने हो ।

तपाईंप्रति प्रतिनिधिको कस्तो समानुभूति रहेको पाउनु भएको छ ?

१० औं महाधिवेशनमा म ४० बर्ष मुनिको कान्छी केन्द्रीय सदस्य थिएँ । एमाले जस्तो गौरवशाली इतिहास बोकेको पार्टी र नेतृत्वबाट धेरै कुराहरु सिक्ने र बुझ्ने अवसर पाएकी छुँ । देशै भरका नेता, प्रतिनिधि साथी र कार्यकर्ता माया,साथ र हौसला पाएकी छुँ ।

एमाले पार्टीमा तपाईं जस्ता युवा नेताको किन आवश्यक छ ?

हालको नेतृत्व आफैमा एउटा विश्वविद्यालय हो । हामीले उहाँको विगतको इतिहास संघर्ष र बलिदानीबाट यो लोकतान्त्रिक ब्यवस्था पाएका हौँ । र भोलि एमालेको सिंगो जिम्मेवारी हाम्रो काँधमा हुनेछ । हामी पार्टी र देशको भविष्य हो । हालको जेनजी आन्दोलनले परिवर्तनको माग त गर्यो तर युवामा राजीतिक सिद्धान्त अनुशासन र संयमताको कमिले गर्दा अराजकता र अकर्मण्यता बढ्यो मुलुक दिशाहीन अशान्त र बाह्य मुलुकको नजरमा अझ कमजोर देखिँदै छ ।

एमालेको युवा नेतृत्व अनुशासन राजनीतिक ज्ञान र लामो समयदेखि स्कुलबाट नै संघर्षमा खारिदै, संकटलाई सहज ब्यवस्थापन गर्दै आइरहेका छन् । ति युवालाई पार्टीले समेटन सक्ने हो भने पार्टी मुलुकको युवा जनशक्तिको आईडल बन्न सक्ने छ ।

अनुशासित क्रियाशिल र कर्तब्यनिष्ठ युवा नेताहरु एमालेको भविष्यको रुपमा स्थापित हुनुपर्छ भन्ने मान्यता सहित हामी युवाहरुको यसपटक केन्द्रीय कमिटीमा सशक्त दावी रहने छ ।

अहिले एमालेको ११ औं राष्ट्रिय महाधिवेशन भइरहँदा मुलुकको राजनीतिक अवस्था र युवालाई एमालेमा सशक्त स्थापित गर्ने मान्यतासहित १० प्रतिशत अनिवार्य गराएको छ । यो उपस्थितिले एमालेमा पुस्तान्तरणको गराउने छ ।

जेनजी आन्दोलनले उठाएका कुरा अब तपाईं फेरि केन्द्रीय सदस्य भएपछि कसरी उठाउनुहुन्छ ?

देशमै बढ्दो बेरोजगारी, भ्रष्टाचार नेपोटीजम र सुशासन जस्ता मागहरु हामीले विद्यार्थी आन्दोलनमार्फत लामो समयदेखि उठाएका साझा मागहरु हुन् । धेरै हदसम्म यिनको सम्बोधन भएको पनि थियो । मुलुक विकासको गतिमा उक्लन खोज्दै थियो । विश्वविद्यालयदेखि अस्पताल विकेन्द्रिकृत हँदै थिए । राज्यले भौतिक निर्माणमा फड्को मार्न खोज्दै थियो । पेट्रोलियम खानीदेखि मिथेन ग्याँस हुँदै फलाम खानीहरु उत्खनन्को अवस्थामा पुग्दै थिए जसले देशको आर्थिक अवस्थामा कायापलट मात्रै होइन नेपाललाई अर्कै युगमा प्रवेश गराउँथ्यो । जुन कुरा शक्ति राष्ट्रहरुको दाँतमा ढुंगा लागे जत्तिकै थियो । नेपालको भलो नचाहने विभिन्न शक्तिको योजनामा जेनजी आन्दोलन भयो । यो असाध्यै दुर्भाग्य हो ।

जेनजीका जायज मागलाई हामी अझै परिस्कृत गर्ने नै छौं र साथै डिजिटल दुनियाँमा चलाइएको ब्रेनवास युद्धलाई नेपाली युवाले बुझ्ने गरि अबको दिनमा मिडिया आधिकारिकता र सभ्य समाज अनुशासित युवा निर्माणमा एमालेले आगामी रणनीति तयार गर्नेछ । जुन मुलुकका समग्र युवा र देशको हितमा हुनेछ । हो तिनै कुराहरु पुरा गर्नका लागि म फेरि केन्द्रीय सदस्यमा उम्मेदवारी दिँदैछु र सबैको सहयोगले बिजय पनि हुनेछु ।