कञ्चनपुर । कञ्चनपुर कारागारमा कैदीबन्दीबीच झडप हुँदा आठ जना घाइते भएका छन् । कारागारको आन्तरिक प्रशासन चलाउने नाइके र चौकीदारसँग अन्य कैदीबन्दीको शुक्रबार बेलुका झडप हुँदा आठ जना घाइते भएका हुन् ।

जिल्ला प्रहरी कार्यालयका प्रवक्ता डीएसपी सागर बोहराका अनुसार घाइते सबैको महाकाली प्रादेशिक अस्पतालमा उपचार भइरहेको छ । घाइतेको अवस्था सामान्य रहेको डीएसपी बोहराले बताए । ‘कारागारमा रहेका नाइके र चौकीदारले व्यवहारमा विभेद गरेको भन्दै सुरु भएको विवाद झडपमा परिणत भएको हो’, डीएसपी बोहराले भने, ‘अहिले भने कारागारको अवस्था सामान्य छ ।’

यता, प्रमुख जिल्ला अधिकारी लक्ष्मण ढकालले घटनाको छानबिनका लागि समिति गठन गर्ने बताए ।