काठमाडाैं । नेपाली कांग्रेसका महामन्त्री विश्वप्रकाश शर्माले पार्टी विभाजन नहुने दाबी गरेका छन् ।

शुक्रबार सानेपामा केन्द्रीय कार्यसम्पादन समितिको बैठकमा सहभागी हुन पुगेका उनले पत्रकारसँग बोल्दै विधानअनुसार काम भए कांग्रेस विभाजन नहुने बताए । पार्टी फुट्छ कि भनेर आशंका नगर्न पनि कार्यकर्तालाई आग्रह गरे।

“विधानअनुसार कुनै पनि कार्य गरेर जाँदै गर्दा फुट्दैन, एकढिक्का रहन्छ । एकढिक्का रहने सन्दर्भमा कसैलाई आशंका छ भने त्यो आशंका नराख्नुभए हुन्छ,” उनले भने ।

उनले आफूहरूको लडाइँ नेतृत्वका लागि नभई नीतिका लागि रहेको बताए । शर्माले निर्वाचनअघि राष्ट्रिय संकल्प गर्नुपर्ने नभए विषेश महाधिवेशनमार्फत नेतृत्व परिवर्तन गर्नुपर्ने विकल्पमा कार्यसम्पदान समिति बैठकमा छलफल हुने जानकारी दिए ।