काठमाडौँ । राष्ट्रिय जनमोर्चाले चुनावी घोषणापत्र सार्वजनिक गरेको छ ।

बुधवार बुटवलमा आयोजित एक कार्यक्रमकाबीच राष्ट्रिय जनमोर्चाका अध्यक्ष चित्र बहादुर केसी लगायतका नेताहरूले प्रतिनिधिसभा निर्वाचन घोषणा पत्र २०८२ सार्वजनिक गरेका हुन् ।

घोषणापत्रमा संघीयता खारेज हुनुपर्ने र देशको राष्ट्रियता, सार्वभौमता र अखण्डताको रक्षा हुनुपर्नेलगायतका विषयलाई समावेश गरिएकाे छ ।

पार्टीको घोषणापत्र सार्वजनिक गर्दै अध्यक्ष केसीलेसंघीयताको खारेजी गरी गणतन्त्र र राष्ट्रियतामाथि आएको संकटकाविरुद्ध सबैजना एकजुट हुनुपर्ने समय आएको बताए ।

उनले यसअघिको सरकारमा, सत्तामा भएकाबाट आफ्ना उद्देश्य पूरा नहुने हुनाले चलिरहेको संसदलाई विघटन गरेर एनजिओ आइएनजीओका मान्छे सरकारमा राखेर चुनाव गराउन खोजिएको आरोप लगाए । समयमा नै चुनाव नहुने विश्वासका साथ सरकारमा गएकाहरू चुनाव हुने भए पनि आफ्नो फाइदा हेरेर राजीनामा दिँदै चुनावमा होमिएको उनले बताए ।

घोषणापत्रमा प्रवासी नेपालीलाई मताधिकार, विदेशी ऋणको दुष्चक्रबाट मुक्ति अन्तर निर्वाचन क्षेत्रबाट मताधिकारको व्यवस्था, दुर्गम गाउँमा सुपथ मूल्य पसल, पहाडबाट बसाइसराइ न्यूनीकरण, द्वन्द्व पीडितलाई न्याय र राहत, बौद्धिक पलायन रोक्ने प्रतिबद्वता गरिएकाे छ ।

त्यस्तै जेष्ठ नागरिकको स्वास्थ्यको पूर्ण जिम्मा, मजदुरहरूको हकहित र रोजगारीको व्यवस्था, खाद्य सुरक्षा, कारागारको अवस्थामा सुधार, एकीकृत नमुना बस्ती, ग्रामीण विकास मानव अधिकारको पूर्ण पालना, खेलकुद‚ शिक्षा र सामाजिक सुरक्षाको नीति अपनाइने घोषणापत्रमा उल्लेख छ ।