चीनले मध्यपूर्वमा दिनानुदिन भड्किरहेको द्वन्द्व अन्त्य गर्न युद्धविराम तथा कूटनीतिक वार्ताको माध्यम प्रयोग गर्न आह्वान गरेको छ । हाल इजरायल र अमेरिकाले इरान र लेबनानमा निरन्तर आक्रमण गर्दै आएका छन् भने द्वन्द्व क्षेत्रीय छिमेकी देशहरूसम्म फैलिएको छ ।

विदेश मन्त्रालयका प्रवक्ता माओ निङले पत्रकार सम्मेलनमा द्वन्द्व अन्यका लागि सबैभन्दा पहिले सैन्य कारबाहीको तत्काल अन्त्य र द्वन्द्वको फैलावट रोक्नु पर्ने जनाउँदै वार्ताको माध्यमबाट समस्याको समाधान गर्न आग्रह गरेकी छन् ।

तेहरानमा द्वन्द्वको परिणामस्वरूप एक जना चिनियाँ नागरिक मारिएको उनले बताइन् । इजरायल र अमेरिकाले इस्लामिक गणतन्त्रको सर्वोच्च नेताको हत्या गरेको छ भने अपरेसन र आक्रमण गरिरहेको छ ।

विदेश मन्त्रालयले इरानमा रहेको चिनियाँ दूतावासलाई पीडित व्यक्ति र परिवारलाई सहयोग गर्न निर्देशन दिएको माओले बताइन् । बेइजिङले गत हप्ता आफ्ना नागरिकहरूलाई वर्तमान सुरक्षा अवस्थाको बारेमा सजग गराउँदै इरानको यात्रा नगर्न चेतावनी दिएको थियो ।

यसैबीच सोमबारसम्म तीन हजारभन्दा बढी चिनियाँ नागरिक इरान छोडेर गएको जनाइएको छ । इरानको रिभोलुसनरी गार्डसले इजरायल र अमेरिकाविरुद्ध इतिहासमा सबैभन्दा हिंस्रक अपरेसन सुरु गर्ने वाचा गरेको छ ।