आईसीसी टी–२० विश्वकप २०२६ को उपाधिका लागि आइतबार साबिक विजेता भारत र न्यु जिल्यान्ड भिड्दै छन्। 

अहमावादस्थित नरेन्द्र मोदी स्टेडियममा हुने खेल फाइनल आइतबार साँझ सवा ७ बजे सुरु हुनेछ। घरेलु मैदानमा हुने विश्वकपको फाइनलमा भारतिय क्रिकेट टोली नयाँ इतिहास लेख्न आतुर छ।

आइतबार हुने फाइनलमा भारतले न्यु जिल्यान्डलाई पराजित गरे आईसीसी पुरुष टी–२० विश्वकप जित्ने पहिलो आयोजक राष्ट्र, उपाधि रक्षा गर्ने पहिलो टोली र तिन विश्वकप जित्ने पहिलो टोली बन्नेछ ।  

भारतले बिहिबार राति भएको दोस्रो सेमिफाइनलमा इंग्ल्यान्डलाई ७ रनले पराजित गर्दै न्यु जिल्यान्डसँगको भेट पक्का गरेको हो। 

सन् २००७ देखि सुरु भएको विश्वकपको दशौँ संस्करणको आयोजना भारत र श्रीलंकाले संयुक्त रुपमा आयोजना गरेका हुन्। अर्को विश्वकप आयोजक टोली श्रीलंका सुपर ८ बाटै बाहिरिएको थियो। 

भारतले यसअघि सन् २००७ र २०२४ को विश्वकपको उपाधि उचालेको थियो । न्यु जिल्यान्डले भने बुधबार भएको पहिलो सेमिफाइनलमासाविक उपविजेता दक्षिण अफ्रिकालाई ९ विकेटले हराउँदै फाइनलमा स्थान बनाएको थियो।