इरानले अमेरिकी राष्ट्रपति डोनाल्ड ट्रम्पको इरानसँग वार्ता भएको र सहमति नजिक रहेको भनि यसअघी सार्वजनिक गरेका भनाइको भ्रामक भन्दै खण्डन गरेको छ ।

इरानको परराष्ट्र मन्त्रालयले आधिकारिक प्रेस विज्ञप्ति जारी गर्दै अमेरिकी राष्ट्रपति डोनल्ड ट्रम्पद्वारा हालै दिइएका अभिव्यक्तिहरूलाई पूर्ण रूपमा भ्रामक र रणनीतिक छल भन्दै खण्डन गरेको हाे ।

मन्त्रालयले जारी गरेको विज्ञप्तिमा तेहरान र वासिङ्टनबीच कुनै पनि प्रकारको वार्ता वा छलफल नभएको तथा सहमति नजिक पुगेको भनी गरेका दाबीहरूमा कुनै सत्यता नरहेको जनाएको छ । इरानले अमेरिकासँग प्रत्यक्ष वा अप्रत्यक्ष रूपमा कुनै पनि सम्झौताको लागि अनुरोध नगरेको जनाएको छ ।

इरानले इन्धनको मूल्य घटाउन र मूल्यलाई स्थिर बनाउन र बजारमा मनोवैज्ञानिक प्रभाव पार्न ट्र्म्पले झुटो दावी गरेको जिकिर गरेको छ ।

यस्तै सैन्य तयारीका लागि इरानका पावर प्लान्टहरूमा हुने भनिएको आक्रमणलाई ५ दिन रोक्नु कूटनीतिक सफलता नभई, अमेरिकी र इजरायली सेनाले आफ्नो सैन्य रणनीति पुनरावलोकन गर्न लिएको समय मात्र भएको इरानको परराष्ट्र मन्त्रालयले जनाएको छ ।

इरानले स्पष्ट पारेको छ कि टर्की र ओमान जस्ता क्षेत्रीय देशहरूले तनाव कम गर्न पहल गरिरहेका छन् । तर इरानको जवाफ छ, ‘हामीले यो युद्ध सुरु गरेका होइनौं। त्यसैले शान्ति र वार्ताका सबै मागहरू वासिङ्टनतर्फै निर्देशित गरिनुपर्छ। जबसम्म हाम्रो सार्वभौमसत्तामाथि आक्रमण जारी रहन्छ, हामी आफ्नो प्रतिरक्षा गरिरहनेछौं।’

इरानले जबसम्म इरानको पूर्वाधारमाथिको खतरा हट्दैन र युद्धको क्षतिपूर्ति हुँदैन, तबसम्म हर्मुज जलमार्गबाट हुने ढुवानीमा इरानको कडा निगरानी र नियन्त्रण कायम रहने दोहराएको छ ।

यसअघि अमेरिकी राष्ट्रपतिले इरानीहरूले उनलाई वार्ताका लागि फोन गरेको १५ बुँदे सहमति नजिक पुगेको दावी गरेका थिए ।