काठमाडौं । प्रधानमन्त्री शेरबहादुर देउवाले जेठ ५ भित्रै स्थानीय तहको निर्वाचन हुने बताएका छन् । स्थानीय तहका जनप्रतिनिधिहरुको आगामी जेठ ५ मा पदावधी सकिन लागेकाबेला सरकारले सथानीय तहको निर्वाचन मिति घोषणा नगरेको भन्दै आलोचना भइरहँदा प्रधानमन्त्रीले जेठ ५ भित्रै चुनाव हुने प्रतिवद्धता जनाएका हुन् ।

कांग्रेसको वागमती प्रदेशबाट निर्वाचित पदाधिकारीहरुसँग प्रधानमन्त्री निवास बालुवाटारमा भएको भेटवार्तामा प्रधानमन्त्री देउवाले वर्तमान संविधान र ऐनमा संशोधन नगरी जेठको पहिलो साता नै निर्वाचन गर्ने तयारीमा सरकार जुटिसकेको बताएका हुन् ।

प्रधानमन्त्रीको भनाई उदधृत गदै कांग्रेसको बागमती प्रदेशका उपसभापति मोहनवहादुर बस्नेतले भने, स्थानीत तहको चुनावमा अन्यौलता छदै छैन, जेठ ५ भित्रै सरकार चुनाव गराउने तयारीमा जुटिसकेको छ । संविधान र ऐनको संशोधन नगरीकनै जेठ ५ भित्रै चुनाव हुन्छ । ढुक्क भए हुन्छ ।

प्रधानमन्त्रीले ऐन संशोनको काम झन्झटिलो भएकोले संसोधनतिर सरकार नलागेको पनि प्रष्टाएका थिए ।

‘ऐन संशोधन गर्न झन्झट छ, त्यसैले सकेसम्म ऐन संशोधन नगरी स्थानीय तहको निर्वाचन गर्ने प्रयत्न भइरहेको छ, जेठको ५ गतेभित्रै स्थानीय तहको निर्वाचन हुन्छ, एकै चरणमा हुन्छ ।’

प्रधानमन्त्री देउवाले सत्तारुढ गठबन्धन दलहरूबीच स्थानीय तहको निर्वाचनमा गठबन्धन गरेरै चुनाव लड्ने तयारी भएको समेत बताएका थिए ।

सत्तागठबन्धन दलका वीचमा सायद गठबन्धन निर्माण भएरै चुनावमा गइन्छ होला, तपाईहरुले पनि त्यही अनुसारको तयारी थाल्नुस्, प्रधानमन्त्रीले भनेका थिए ।