काठमाडौँ । काठमाडौँ जिल्ला अदालतले आफ्नो सेवा सानो बनाएको समयावधि २८ माघसम्म लम्ब्याएको छ । अदालतको बिहीबार बसेको पूर्ण बैठकले ५ माघको निर्णय बमोजिम भएको सेवा संकुचनलाई निरन्तरता दिने निर्णय गरेको हो ।

कोरोना भाइरस (कोभिड–१९)को नयाँ भेरियन्ट ओमिक्रोनलगायत विभिन्न कारणले न्यायाधीश, कर्मचारी संक्रमित भएको र यस अवस्थामा स्वास्थ्य सुरक्षालाई मध्यनजर गर्दै सेवा विस्तार कम गरेको हो । कोभिड संक्रमणको जोखिम न्यूनीकरण गर्न भन्दै ५ माघको पूर्ण बैठकले ६ माघदेखि १८ माघसम्म सेवा संकुचन गर्ने निर्णय गरेको थियो । सोही निर्णयलाई बिहीबार बसेको पूर्ण बैठकले पुनः निरन्तरता दिने निर्णय गरेको हो ।

‘मुद्दा÷निवेदन दर्ता गर्ने सम्बन्धमा अत्यावश्यक भएमा मात्र अदालतमा उपस्थित भई सेवा लिन र तारिख लिनेलगायत सेवाहरू लिने क्रममा जनस्वास्थ्यका निर्धारित मापदण्ड पालना गरी भिडभाड हुन नदिई सामाजिक दुरी कायम गरिदिन’ अदालतले भनेको छ ।