काठमाडौँ । प्रधानमन्त्री शेरबहादुर देउवा, प्रमुख प्रतिपक्षी नेकपा (एमाले) अध्यक्ष केपी ओली र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’बीच आइतबार दुई घण्टा छलफल भएको छ ।

लामो समयपछि प्रमुख प्रतिपक्षी दल नेकपा एमालेका अध्यक्ष ओलीसहित आइतबार बालुवाटारमा छलफल भएको हो ।

प्रधानमन्त्री देउवाको निमन्त्रणामा सात महिनापछि बालुवाटार छिरेका एमाले अध्यक्ष ओलीलाई देउवाले अमेरिकी परियोजना एमसीसीलाई सघाउन आग्रह गरेका थिए । जवाफमा ओलीले पुरानै कुरा दोहोर्याएका छन् । ओलीले एमसीसीबारे सरकारको तर्फबाट स्पष्ट धारणा मागेका थिए ।

भेटमा स्थानीय तहको निर्वाचन, अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) र संसद् खुलाउने विषयमा छलफल भएको ओलीसँगै बालुवाटार पुगेका एमाले महासचिव शंकर पोखरेलले जानकारी दिए ।

आइतबारको बैठकपछि सञ्चारकर्मीहरूसँग कुराकानी गर्दै एमाले महासचिव पोखरेलले एमसीसीबारे सत्तापक्षले स्पष्ट दृष्टिकोण सार्वजानिक नगरेसम्म एमाले नहतारिने बताए ।

तीन शीर्ष नेताबीचको छलफलमा सञ्चारमन्त्री ज्ञानेन्द्रबहादुर कार्की पनि सहभागी थिए ।