काठमाडौँ । गत बिहीबार र शुक्रबार परेको हिमपातका कारण अवरुद्ध म्याग्दीको धौलागिरि गाउँपालिका १ गुर्जाको विद्युत् र सञ्चार सेवा सुरु भएको छ । स्थानीयबासीको सहयोगमा विद्युत् र सञ्चारका उपकरणको मर्मतपछि सेवा सञ्चालन भएका धवलागिरि १ गुर्जाका वडाध्यक्ष झक छन्त्यालले जानकारी दिए ।

उनका अनुसार यही माघ २० गते बिहानदेखि गुर्जामा हिउँले ती उपकरणमा क्षति पुर्‍याएपछि सेवा अबरुद्ध भएको थियो । विद्युत् सेवा सुरुसँगै मोबाइल र इन्टरनेट सेवासमेत सञ्चालनमा आएको छ ।

गुर्जा क्षेत्रमा अझै तीन फिटभन्दा बढी हिउँ जमेको उनले जानकारी दिए । यसैगरी हिमपातका कारण अवरुद्ध भएको लुलाङदेखि गुर्जा जाने पदमार्ग खुलाउने प्रयास भइरहेको उनले बताए ।