काठमाडौं । हृदयश त्रिपाठी नेतृत्वको ‘जनता प्रगतिशील पार्टी’ निर्वाचन आयोगमा दर्ता गर्न प्रक्रिया अगाडी बढाएको छ । उक्त पार्टीका नेता राधेरमण पाण्डेले निर्वाचन आयोगमा पार्टी दर्ता गराउनका लागि निवेदन दिने तयारी भइरहेको बताए ।
उनलेभने,‘ अहिले निवेदन दर्ताका लागि आवश्यक कागजपत्र तयार गरिरहेका छौं, सबै तयारी पुरा भएमा बिहिबार दल दर्ताका लागि आयोग जान्छौं ।’
त्रिपाठी अध्यक्ष रहने गरी जनता प्रगतिशिल पार्टीमा २१ सदस्यीय केन्द्रीय कार्य समिति रहने बताइएको छ ।

मंगलबार अध्यक्ष त्रिपाठीसहितका केही नेताहरु निर्वाचन आयोग पुगेर स्थानीय तहको नामांकन र सीमांकन बारे भएको निर्णय कार्यान्वयन गराउन माग गरेका थिए।

स्थानीय तहको चुनावअघि नै आयोगको सिफारिश अनुसार प्रदेश १, लुम्बिनी प्रदेश र सुदूरपश्चिम प्रदेशमा पनि कार्यान्वयन हुनुपर्ने भनि निर्वाचन आयोगका प्रमुख आयुक्त दिनेशकुमार थपलियालाई ध्यानाकर्षण समेत गराएका थिए ।

यता, प्रमुख आयुक्त थपलियाले सरकारले पत्र पठाउने वित्तिकै आफूहरुले त्यसलाई कार्यान्वयनमा ल्याउने बताएका थिए ।