काठमाडौं । सरकारले अमेरिकी सहयोग परियोजना एमसीसी संसदबाट अनुमोदन गर्ने तयारी गरिरहँदा सत्त गठबन्धनको प्रमुख घटक नेकपा (एकीकृत समाजवादी) एमसीसीविरुद्ध सडकमा उत्रिएको छ ।

एकीकृत समाजवादी निकट युवा संगठनले देशका विभिन्न ठाउँमा एमसीसीविरुद्ध प्रदर्शन गरिरहँदा माउ पार्टी एकीकृत समाजवादीले नै आइतबार रुपन्देहीको बुटवलमा प्रदर्शन गरेको छ ।

माधव नेपाल नेतृत्वको एकीकृत समाजवादीका नेता कार्यकर्ताहरुले एमसीसी खारेजीको माग गर्दै आइतबार बुटवलमा प्रदर्शन गरेका हुन् ।

एकीकृत समाजवादी रुपन्देहीको आयोजनामा भएको प्रदर्शनमा कार्यकर्ताहरुले एमसीसी खारेज गरौं, राष्ट्रिय स्वाभिमानको रक्षा गरौँ, वैदेशिक हस्तक्षेप मुर्दावादलगायत नारा लेखिएका प्लेकार्ड बोकेका थिए ।

विरोध प्रदर्शनपछिको कोणसभामा नेकपा एकीकृत समाजवादीका केन्द्रीय सदस्य तथा रुपन्देही अध्यक्ष राजु गुरुङले एमसीसी सम्झौता राष्ट्रिय हितमा नभएको भन्दै तत्काल खारेज गर्नुपर्नेमा जोड दिएका थिए ।