काठमाडौँ । नेकपा एमालेका अध्यक्ष केपी शर्मा ओली निवास बालकोटमा एमालेका नेताहरूबीच भेट वार्ता भएको छ । वार्तामा नेताहरू शंकर पोखरेल, सुभाष नेम्वाङ, विष्णु पौडेललगायत सहभागी छन् ।

बिहीबार साँझ प्रधानमन्त्री शेरबहादुर देउवा एमाले अध्यक्ष ओलीलाई भेट्न बालकोट पुगेका थिए । त्यसको भोलिपल्ट आज बिहान एमाले नेताहरू बालकोटमा वार्ताका लागि सहभागी भएका हुन् । पत्नीसहित बालकोट पुगेका देउवाले ओलीसँग के कुरा गरे भन्नेबारे खुलाएका छैनन् ।

यस्तै, आज बस्ने प्रतिनिधिसभा बैठकमा प्रधानमन्त्री शेरबहादुर देउवाले अमेरिकी सहयोग परियोजना मिलिनियम च्यालेञ्ज कर्पोरेशन (एमसीसी) पेश गर्ने तयारी गरिरहँदा एमाले नेताहरू छलफलमा जुटेका हुन् ।

यसअघि प्रधानमन्त्री देउवाले एमसीसी संसदमा पेश गर्न सत्ता गठबन्धन दलहरूसँग छलफल गर्दै आएका थिए । गठबन्धनभित्र सहमति नजुटेपछि उनी ओलीलाई भेट्न पुगेका थिए । सोही विषयमा छलफल गर्न एमाले नेताहरू बालकोटमा छलफलमा जुटेको जनाइएको छ ।