काठमाडौं । नेपाली कांग्रेसका सांसद डा. सशांक कोइरालाले नेपाली कांग्रेस र एमालेबीच बठबन्धन बन्ने संकेत गरेका छन् ।
शुक्रबार संसद भवन बाहिर सञ्चारकर्मीसँग कुरा गर्दै सांसद कोइरालाले एमसीसी पास भएपछि एमालेसँग गठबन्धन हुन सक्ने सम्भावना औंल्याएका हुन् ।
एमसीसीकै कारण सत्ता ध्रुवीकरणको अवस्था आएको उनले बताए । एमसीसी संसदबाट नै पास हुने दाबी गर्दै उनले त्यसपछि नेकपा एमालेसँग गठबन्धन सरकार बन्न सक्ने बताएका हुन् । तर पनि प्रधानमन्त्री शेरबहादुर देउवाले गठबन्धन जोगाउन र एमसीसी पास गर्न अन्तिमसम्म लागिरहेको कोइरालाले बताए ।
उनले एमालेको सहयोगबाट एमसीसी संसदबाट नै पास हुने दाबी गरे ।
‘शेरबहादुरजीको अन्तिम प्रयास एमसीसी पनि पास गराऔँ, गठबन्धन पनि नटुटाऔँ भन्ने हुन्छ । त्यही प्रयास निरन्तर अहिले पनि चलिरहेको छ ।’– कोइरालाले भने ।

कोइरालाले एमसीसीको पक्षमा वकालत गर्दै एमसीसी नेपालको लागि राम्रो भएको दाबी गरे । ‘नौ देशहरुमा एमसीसी लागू भइसकेको छ, त्यहाँ अमेरिकाको न सेना आएको छ, न त्यहाँ कुनै हस्तक्षेप भएको छ । मंगोलिया जस्तो देशमा पनि एमसीसी बरकरार छ, त्यसकारण एमसीसी हाम्रो लागि राम्रो हो ।’ – उनले भने ।