काठमाडौँ । अख्तियार दुरुपयोग अनुसन्धान आयोगले २७ वर्षअघिको भ्रष्टाचार ब्यूँत्याउने प्रयास गरेको छ । विं.सं. २०५१ सालको वैशाख ११ गते तनहुँस्थित शुक्लागण्डकी नगरपालिका १६ को हिमाली प्राविको विद्यालय व्यवस्थापन समितिले निर्णय गरेर सार्वजनिक जग्गा बिक्रीबारे आयोगले अनुसन्धान थालेको हो ।

साविक ढोरफिर्दी गाविसमा रहेको जग्गा विभिन्न व्यक्तिलाई घरसारको कागज बनाई गैरकानुनी रुपमा जग्गा बेचेपछि समितिविरुद्ध उजुरी पर्‍यो । समितिका तत्कालीन अध्यक्ष याम बहादुर बानिया, सदस्य सचिव (प्रधानाध्यापक) याम बहादुर ठकुरीसहित ७ जनाविरुद्ध उजुरी परेको थियो ।

समितिका सदस्य घनश्याम बाँनिया, हरि कुमारी महत, धुन बहादुर पुलामी, ज्ञान बहादुर बाँनिया र खडक बहादुर बाँनियासहितले एक लाख ६९ हजार रुपैयाँ लिएर सरकारी जग्गा भोगचलन गर्ने गराउने गरेको अख्तियारको अनुसन्धानबाट खुलेको छ ।

बिक्री भएको जग्गाको एक लाख ६९ हजार विगो कायम गरेर उनीहरूविरुद्ध विशेष अदालतमा मुद्दा दर्ता गरिएको हो । आरोपितमध्ये याम बहादुर, धुन बहादुर, ज्ञान बहादुर र खडक बहादुरको मृत्यु भइसकेको छ । मृत्यु भए पनि उनीहरुले भ्रष्टाचार गरेको देखिएकोले उनीहरुसँग मागदावी लिइएको छ ।

सार्वजनिक जग्गालाई घरसारको कागजातहरु बनाई आँफैले घडेरी नम्बर कायम गरेर भोगचलन गरेको आरोपमा खरिद गर्नेलाई समेत अख्तियारले आरोपी बनाएको छ । सन्त बहादुर सिजालीमगर, तिलुदेवी वराल, डोलराज आचार्य, डिल बहादुर आले, विष्णुमाया थापा, विष्णु प्रसाद लम्साल, शरण बहादुर बिक, बलराम वानिया, बुद्दिमाया बिक, बाबुराम बानिया, लोक बहादुर माकिम, पूर्ण बहादुर बिक र धन बहादुर बिकले विद्यालय व्यवस्थापन समितिलाई पैसा दिएर जग्गा भोग चलन गरेका थिए ।

उनीलाई मतियारको रुपमा कारबाही माग गरिएको छ । भोगचलन गरिरहेकाबाट जग्गाको भोग हटाई जफत गर्न माग गरिएको अख्तियार प्रवक्ता श्यामप्रसाद भण्डारीले जानकारी दिए । भोगचलन गरेकामध्ये लोक बहादुर, डोलराज र धन बहादुरको मृत्यु भइसकेको छ ।