काठमाडौं । काठमाडौंको काँडाघारीमा बम राखेको अभियोगमा सांसद नविना लामाका पिता माणिक लामालाई पक्राउ गरिएको छ । नेपाल प्रहरीको विशेष व्यूरोले अनुसन्धानका लागि लामालाई पक्राउ गरिएको हो ।

करीव एक महिना अगाडि काँडाघारी नजिकै बम राखेको घटनामा संलग्न व्यक्तिहरूसँग सम्पर्कमा देखिएको र उनी संलग्न रहेको आरोपमा पक्राउ गरिएको प्रहरीको उच्च स्रोतले जनाएको छ । उनलाई महानगरीय प्रहरी वृत्त तीनकुनेमा राखिएको छ ।

नेकपा विप्लवसँग आवद्ध रहेका माणिकको समूहले गत फागुन १५ गते अमेरिकी सहयोग अनुदान मिलेनियम च्यालेन्ज कर्पोरेशन एमसीसी अनुमोदन भएको दुई दिनपछि काँडाघारी नजिकै बम राखेर स्थानीयलाई आतंकित तुल्याएको आरोप लगाइएको छ ।

सरकारसँग तीन बुदे सहमति गरेर खुला राजनीतिमा आएको विप्लव समूहलाई अहिले पनि सरकारले दुःख दिइरहेको जनाइएको छ । माणिक लामा यसअघि भूमिगत भएका थिए । विल्लव समूह खुला राजनीतिमा आएसँगै उनी पनि खुला भएका थिए । प्रहरीले यसअघि पनि उनलाई पक्राउ गरेको थियो ।