काठमाडौँ । सरकारले राष्ट्र बैंकका गभर्नरलाई निलम्बन गर्ने भएको छ । गभर्नर महाप्रसाद अधिकारी निलम्बित भएसँगै डेपुटी गभर्नर निलम ढुंगानालाई कार्यबाहक दिइएको अर्थ मन्त्रालय जनाएको छ ।

बिहीबार बसेको मन्त्रिपरिषद् बैठकमै गभर्नर अधिकारीबारे प्रश्न उठेको थियो । विलासी वस्तु आयात रोक्न अर्थ मन्त्रालयले दिएको निर्देशनसम्बन्धी सूचना चुहाएको आरोपमा गभर्नरमाथि अध्ययन गर्न मन्त्रीहरूको अनौपचारिक टिम बनेको थियो ।

त्यो टोलीमा गृहमन्त्री बालकृष्ण खाँण, अर्थमन्त्री जनादर्न शर्मा, सञ्चारमन्त्री ज्ञानेन्द्रबहादुर कार्की, उर्जामन्त्री पम्फा भुसाल, स्वास्थ्यमन्त्री विरोध खतिवडा र संघीय मामिलामन्त्री राजेन्द्र श्रेष्ठ सहभागी रहेका थिए ।

आज शुक्रबार गभर्नर अधिकारीलाई निलम्बनको पत्र पठाइएको छ । उनीमाथि लागेको आरोपबारे छानविन गर्न पूर्व न्यायाधीश पुरुषोतम भण्डारीको नेतृत्वमा तीन सदस्य छानबिन समिति बनेको छ ।