काठमाडौँ । विप्लव नेतृत्वको नेपाल कम्युनिष्ट पार्टी फुटको सँघारमा पुगेको छ । पार्टीका महासचिव नेत्रविक्रम चन्द ‘विप्लव’ले आगामी वैशाख ३० गते हुने स्थानीय निर्वाचनको विरुद्धमा रहेका पार्टीका सचिवालय सदस्य हेमन्दप्रकाश वली ‘सुदर्शन’ र धर्मेन्द्र बास्तोला ‘कञ्चन’लाई सम्पूर्ण जिम्मेवारीबाट मुक्त गरेसँगै पार्टी फुटको संघारमा पुगेको हो ।

पार्टीबाट निष्कासन भएका दुवै नेता संयुक्त विज्ञप्ति जारी गर्दै महासचिव विप्लवले आफ्नो सबै गल्ती सच्याउनु पर्ने माग राखेका छन् । ‘महासचिवले गरेको यो कथित कारबाही खारेज गरिएको छ र उहाँलाई आफ्ना सम्पूर्ण गल्तीहरू सच्याउन आग्रह गरिन्छ,’ सुदर्शन र कञ्चनले हस्ताक्षर गरेको पत्रमा भनिएको छ ।

उनीहरूले एक विज्ञप्ति जारी गर्दै पार्टी महासचिव विप्लवले आफ्नो नैतिकता गुमाएको आरोप लगाएका छन् । विज्ञप्तिमा उनीहरूले आफूहरूलाई गरिएको कारबाही अवैधानिक भएको टिप्पणी गरेका छन् । स्थानीय निर्वाचनमा भाग लिने विषयमा नेकपाभित्र विवाद चर्किदै गएको थियो ।