काठमाडौं । काठमाडौंको नयाँ बानेश्वरस्थित संसद् भवननजिक सडकमा बम विस्फोट भएको छ ।

गए राति करिब २ बजे सिलिन्डर बम विस्फोट भएको महानगरीय प्रहरी परिसर काठमाडौंका एसपी दिनेश मैनालीले जानकारी दिए ।

‘‘नयाँ बानेश्वरबाट तीनकुने जाने सडकखण्डमा विस्फोट भएको हो । किन र कुन प्रयोजनको लागि विस्फोट गरियो भन्नेबारे अनुसन्धान जारी छ,” उनले भने ।

काठमाडौं प्रहरी परिसर, टेकुका एसपी दिनेशराज मैनालीका अनुसार एक जना व्यक्तिले बिहान २ बजे संसद भवनको १ नम्बर गेट नजिकै सिलिण्डर फ्यालेर आगो लगाएर विष्फोट गराएको पाइएको छ ।

हाल ती व्यक्तिको खोजीमा काठमाडौं प्रहरीसहित उपत्यका अपराध अनुसन्धान कार्यालयको टोली पनि परिचालित भएको छ । यद्यपि, हालसम्म उनी पक्राउ परेका छैनन् ।

निर्वाचनको विरोधमा रहेको कुनै समूहले आफ्नो उपस्थिति देखाउन विष्फोट गराएको हुनसक्ने आशंका गरिएको छ । घटनामा कुनै क्षति भएको छैन ।घटनास्थलबाट ‘नेकपा सिवादी’को एउटा पर्चा पनि प्रहरीले बरामद गरेको छ ।