काठमडाौं । नेकपा (एमाले)का सचिव योगेश भट्टराईको गृहपालिकामा एमाले पराजित भएको छ ।

ताप्लेजुङको मैवाखोलामा गठबन्धन दलहरू एमालेमाथि हाबी हुँदा योगेशकै घर भएको वडा पनि कांग्रेसले जितेको हो ।

मैवाखोलाका एमाले कार्यकर्ता अलोकप्रियलाई टिकट दिँदाको परिणाम भएको बताउँछन् । स्थानीय चुनावभन्दा धेरै अघिदेखि नै ताप्लेजुङमा केन्द्रीत भएका एमाले सचिव भट्टराई गृहपालिकामा पनि केन्द्रीत थिए। तर, उनको खटाइले गठबन्धनको घेरा चिर्न सकेन ।

मूल थातथलो ताप्लेजुङ भए पनि विद्यार्थी राजनीति गर्दा देखि नै काठमाडौंलाई कार्य क्षेत्र बनाएका भट्टराई संविधान सभाको दुइटा चुनाव हारेपछि २०७४ मा ताप्लेजुङ आएर संसदमा चुनिएका थिए । कुनैबेला अध्यक्ष केपी शर्मा ओली विरोधी खेमामा रहेका उनी पार्टी विभाजनताका माधव नेपालको साथ छाडेर एमालेमै रहेका थिए ।

मैवाखोला गाउँपालिकाको अध्यक्षमा नेकपा माओवादी केन्द्रका उम्मेदवार विजयप्रकाश वनेम विजयी भएका छन् । वनेमले २६०९ मत प्राप्त गरि विजयी बन्दा नेकपा एमालेका राजनकुमार थत्लुङले २०५२ मत प्राप्त गरे।

गाउँपालिका उपाध्यक्षमा गठबन्धनकै तर्फबाट नेपाली कांग्रेसका उम्मेदवार कमलकुमारी लिम्बू विजयी भएकी छिन्। वडाध्यक्षमा १ मा माओवादीका चन्द्रकुमार तामाङ, २ मा नेकपा एकीकृत समाजवादीका नरेन्द्र लिम्बू, ३ मा कांग्रेसका खगेन्द्र थक्लुङ, ४ मा कांग्रेसका फुर्बा शेर्पा, ५ मा माओवादीका केशर लिम्बू र ६ मा एमालेका राजुमान लिम्बू निर्वाचित भएका छन्।