काठमाडौँ । इटालीका अधिकारीले शनिबार हराएको हेलिकोप्टरपछि भेटिएको बताएका छन् । उनीहरूले हेलिकोप्टर दुर्घटनाग्रस्त अवस्थामा भेटिएको र त्यसमा रहेका सात जनाकै मृत्यु भएको बताएका छन् ।

शनिबार बिहान सो हेलिकोप्टर एयर ट्राफिकबाट हराएको जनाएका थिए । सात जना यात्रु बोकेर बेपत्ता रहेको हेलिकोप्टरको खोजी दिनभर भएको उनीहरूको भनाइ छ । शनिबार साँझ हेलिकोप्टर फेला परेको र त्यसमा रहेका सात जनाकै ज्यान गएको उद्धारमा खटेका अधिकारीले जनाएका छन् ।

मध्य इटालियन क्षेत्रको एमिलिया रोमाग्ना नजिकैको एक पहाडको बाटो भएर हेलिकोप्टर उडेको थियो । सोही पहाडको नजिक पुगेर हेलिकोप्टर दुर्घटनाग्रस्त भएको थियो । त्यसमा एक जना इटालियन पाइलट, चार जना टर्कीका नागरिक र अरु दुई जना लेबनानका नागरिक थिए ।

दुर्घटनाको कारण अनुसन्धानरत रहेको यहाँको प्रहरीले जनाएको छ । प्रारम्भिक अनुसन्धानबाट देखिएअनुसार मौसमको खराबीका कारण यो हेलिकोप्टर दुर्घटनामा परेको हो ।