कैलाली । जिल्लाको धनगढी उपमहागरमा स्वतन्त्रबाट मेयर जितेका गोपाल हमालले सत्ता गठबन्धनलाई साथ दिएका छन् । उनको मतले जिल्ला समन्वय समिति (जिसस) कैलालीमा सत्तारुढ गठबन्धनका उम्मेदवार विजयी भएका छन् ।

जिससको प्रमुखमा नेपाली कांग्रेसका पदमबहादुर कलेल र उपप्रमुखमा नेकपा माओवादी केन्द्रका खगराज भुसाललाई मेयर हमालले मत दिएसँगै विजयी भएका हुन् ।

कूल १३ वटा स्थानीय तह रहेको कैलालीमा जिससका लागि नेकपा एमाले र नागरिक उन्मुक्तिले गठबन्धनको १२ मत थियो । यस्तै, सत्तारुढ गठबन्धनका तर्फबाट १३ मत थियो । जसमा मोहन्याल गाउँपालिकाका अध्यक्ष देवीदत्त उपाध्याय पदबाट स्वतः निलम्बित भएपछि १२ मत मात्रै रहेको थियो ।

यसैबीच, स्वतन्त्र उम्मेदवारबाट विजयी भएका हमालले निर्णयक बनेका थिए । अन्तमा उनले सत्तारुढ गठबन्धनलाई मत दिएसँगै कलेल र भुसाल विजयी भएका हुन् ।

यस्तै, सदस्यहरुमा माओवादीबाट दिलु कामी, नेकपा एकीकृत समाजवादीबाट जानकी चौधरी र लोकेन्द्रबहादुर ताडी, नागरिक उन्मुक्ति पार्टीकी सरिता भुल तथा कांग्रेसबाट बिर्खबहादुर बुढा र तेजबहादुर चन्द विजयी भए ।

खुल्लातर्फ एमालेका मानबहादुर साउद र तेजबहादुरको समान १२ मत आएको थियो । गोलाप्रथा गर्दा तेजबहादुर विजयी भएका हुन् ।